पारस खड्कालाई खेलकुद परिषदको सदस्य सचिव बनाउने तयारी

काठमाडौं । युवा तथा खेलकुद मन्त्री बब्लु गुप्ताले राष्ट्रिय खेलकुद परिषदको मंसिर दोस्रो साता रिक्त हुन लागेको सदस्य सचिव पदमा क्रिकेटर पारस खड्कालाई नियुक्ति गर्ने तयारी गरेका छन् ।

नेपाल क्रिकेट संघ(क्यान)का सचिवसमेत रहेका खड्का युवा तथा खेलकुद मन्त्री हुने चर्चा समेत चलेको थियो । खड्कालाई मन्त्री बनाउनका लागि प्रधानमन्त्री सुशीला कार्कीले समेत भेट गरेकी थिइन् । तर छोटो समयका लागि मन्त्री हुनुभन्दा खड्काले ४ बर्षका लागि परिषदको सदस्य सचिव हुने चाहना राखेपछि मन्त्रीमा गुप्तालाई ल्याइएको थियो ।

एनपीएलको पहिलो संस्करणमा ब्यापक अनियमितता भएको भन्दै खड्कामाथि अख्तियार दुरुपयोग अनुसन्धान आयोगमा उजुरी परेको छ ।

अख्तियारले युवा तथा खेलकुद मन्त्रालयलाई उक्त उजुरीका बारेमा छानबिन गरी प्रतिवेदन पठाउन निर्देशन दिएको ५ महिना बितिसक्दा पनि मन्त्रालयले उक्त निर्देशन अटेर गर्दैआएको छ । अख्तियारको छानबिनको दायरामा रहेका उनै खड्कालाई खेलकुद परिषदकै सदस्य सचिव बनाउन प्रधानमन्त्री सुशीला कार्की नै लागेकी छन् ।

एनपीएलको पहिलो संस्करणमा भएको आर्थिक अनियमितताको बिषयमा छानबिनको टुंगो नलाग्दै मंसिर १ गतेदेखि दोस्रो संस्करण आयोजना गर्न लागिएको छ । एनपीएलको प्रायोजक बोलकबोल प्रक्रियाबाट जसले बढी अंक कबोल गर्छ उसैलाई छान्नुपर्नेमा सार्वजनिक खरिद ऐनबिपरीत बिना प्रतिस्पर्धा सेटिङमा छानिएको बिषयमा अख्तियारमा उजुरी परेको हो ।

दोस्रो संस्करणमा पनि प्रतिस्पर्धा नगराई सेटिङमै प्रायोजक छानिएको छ । जसमा करोडौं आम्दानी एनपीएलले ब्यक्तिगत लाभ लिने काम भएको छ । करोडौंको टिकट बिक्रीका लागि पनि बिनाप्रतिस्पर्धा नै सेटिङमा आफूनिकट कम्पनी खल्तीलाई दिन लागिएको आरोप खड्कामाथि लागेको छ ।