कांग्रेस केन्द्रीय कार्यसमिति बैठक बस्दै, महाधिवेशनका बारेमा छलफल हुने

काठमाडौं ।  नेपाली कांग्रेसको स्थगित केन्द्रीय कार्यसमिति बैठक आज बस्दैछ । पूर्वमन्त्री तथा पार्टीका पूर्वकेन्द्रीय सदस्य मोहम्मद अफताव आलमको निधन भएपछि २ दिन स्थगित भएको बैठक आज पुनः बस्ने भएको हो ।

कांग्रेस केन्द्रीय कार्यालयका मुख्यसचिव कृष्णप्रसाद पौडेलले केन्द्रीय समिति बैठक आज बिहान साढे ११ बजे पार्टी कार्यालयमा बस्ने जानकारी दिए ।

गएको असोज २८ गतेबाट जारी केन्द्रीय कार्यसमिति बैठकमा पार्टीको १५ औँ महाधिवेशनबारे छलफल भइरहेको छ । महाधिवेशन कहिले गर्ने भन्नेबारे बैठकमा नेताहरूका फरक–फरक धारणा राखिरहेका छन् । महामन्त्रीद्वय गगनकुमार थापा र विश्वप्रकाश शर्मासहितका नेताहरुले मंसिरमा महाधिवेशन गर्नुपर्ने र त्यसपछि मात्र कांग्रेस चुनावमा जानुपर्ने पक्षमा झन्डै ५५ प्रतिशत महाधिवेशन प्रतिनिधिहरुको हस्ताक्षर नै बुझाइसकेका छन् । तर पार्टीको संस्थापन पक्ष भने आगामी बैशाखामा नियमित महाधिवेशन गर्नुपर्ने पक्षमा छ ।