बिद्युत लाइन काट्ने कुलमानको निर्णयप्रति ज्ञानेन्द्र शाहीको बिरोध, उद्योग बन्द नगर

काठमाडौं । राष्ट्रिय प्रजातन्त्र पार्टीका सांसद ज्ञानबहादुर शाही(ज्ञानेन्द्र)ले उद्योग बन्द नगर्न आग्रह गरेका छन् । जेनजी आन्दोलन र बिध्वंशले देशको उद्योग ब्यवसायमाथि कालो बादल मडाइरहेको बेला शाहीले गलत गर्नेलाई कारबाही गरे पनि उद्योग बन्द नगर्न आग्रह गरेका हुन् ।

देशका उद्योग ब्यापारमाथि आगजनी गरेर उद्योगी ब्यवसायी लगानी गर्नबाट हतोत्साही भएको बेला ऊर्जामन्त्री कुलमान घिसिङले डेडिकेटेड र ट्रंकलाइनको विद्युत महसुल नतिरेको भन्दै सिमेन्ट, रडदेखि बिभिन्न उद्योगको लाइन काटेपछि उद्योगहरु बन्द भएका छन् । देशको बिषम परिस्थितिमा ऊर्जा मन्त्रालयले देशभरका २६ वटा उद्योगका बिद्युत लाइन काटेर ती उद्योग बन्द भएका छन् । हजारौं मजदुर बेरोजगार भएका छन् । लाइन काटेपछि उद्योग बन्द भएको र उद्योगी ब्यवसायीहरु सरकारलाई साँचो बुझाउने तहमा पुगिसकेका छन् ।

शाहीले संसारका कुनै पनि देश र उद्योग कलकारखाना, ब्यवसाय बन्द गरेर सफल र सक्षम नभएको उल्लेख गर्दै सामाजिक संजालमा लेखेका छन्–‘संसारका कुनै पनि देश र उद्योग कलकारखाना ,ब्याबसाय बन्द गरेर सफल र सक्षम हुँदैनन् । हाम्रो देशमा सिमेन्ट उद्योगमा र सरिया, रड, छड उद्योगहरु आत्मनिर्भर मात्र होइन, अरबौँ रुपैयाँको बिदेश निर्यात गर्नसक्ने भइसकेका छन् ।

नेपालका उद्योग–धन्दा बन्द गर्नका लागि विदेशी सामान आयात गर्नका लागि एउटा ठूलो रणनैतिक चाल चलिँदैछ । २०४६–०४७ सालमा मा जसरी ४४ वटा उद्योगधन्दा बन्द गरियो । त्यस्तै नयाँ रणनीतिका लागि विदेशीले नयाँ पपुलर अनुहारको साहारा लिँदैछन् । हामीले जनतालाई यो कुरा राख्दा हाम्रो कुराको विश्वास गर्दैनन् किनकि उनी व्यक्ति अहिले अत्यन्तै पपुलर छन् तर वास्तविकता नेपालका उद्योग कलकारखाना बन्द गर्ने विदेशी सामान आयात गर्ने नै हो । त्यसैले भन्छु ।

यस्ता गलत हर्कत बन्द गर्नुहोस्, होइन भने एकदिन जनताले यो कुरा थाहा पाउनेछन् । आज जस्तै जनताको हजुरलाई भगवान भन्दै पूजेका छन् । त्यति नै त्यो दिन जनताको राक्षस भन्दै गाली गर्नेछन् । किनकि सत्य कहिले लुक्दैन र सत्य एक दिन अवश्य प्रकट हुनेछ ।

गलत गर्ने लाई कार्बाही गर तर उद्योग बन्द नगर ।’