सरकार मलाई पक्रने योजनामा छ: ओली

काठमाडौं । नेकपा एमालेका अध्यक्ष केपी शर्मा ओलीले सरकारले आफुविरुद्ध थप केही गर्छ भन्ने आशंका बढाएको बताएका छन् ।

बुधबार बालकोटस्थित जलेर ध्वस्त भएको घर हेर्न पुगेका ओलीले सञ्चारर्कीसँग प्रतिक्रिया दिँदै गृहमन्त्री ओमप्रकाश अर्यालको अभिव्यक्तिका कारण सरकारले आफुविरुद्ध थप केही गर्छ भन्ने आशंका बढाएको बताएका हुन् ।

साथै उनले गृहमन्त्री अर्यालले आफूविरुद्ध व्यक्तिगत दुश्मनी साँधेको पनि आरोप लगाए । ‘गृहमन्त्रीको अभिव्यक्तिमा सरकारको उद्देश्य र मनसाय देखिन्छ, ममाथि व्यक्तिगत दुश्मनी देखिन्छ, मैले उहाँहरूको सीमा मिचेको छैन’ उनले भने, ‘घर कहाँ हो थाहा पनि छैन, केही गरेको छैन, तर दुश्मनी चर्को देखिन्छ । त्यसमा सरकारले थप केही गर्ने योजना बनाइरहेको आशंका छ ।’

भदौ २३ र २४ मा भएको जेनजी आन्दोलनको क्रममा घटेका घटना सम्बन्धमा बयान दिन नजाने भन्ने ओलीको अभिव्यक्तिलाई लिएर गृहमन्त्री अर्यालले कानूनभन्दा माथि कोही नरहेको बताएका थिए ।

गृहमन्त्रीका अभिव्यक्तिले सरकार आफूलाई पक्रने योजनामा रहेको ओलीले आशंका व्यक्त गरेका हुन् ।

साथै उनले अचानक पलाएको सरकारका धाक धम्कीसँग एमाले नडराउने पनि बताए ।