प्रधानमन्त्री र बेलायती राजदूतबीच शिष्टाचार भेटवार्ता

काठमाडौँ । प्रधानमन्त्री सुशीला कार्की र नेपालका लागि बेलायती राजदूत रोब फेन नेतृत्वको प्रतिनिधिमण्डलबीच आज प्रधानमन्त्री तथा मन्त्रिपरिषद् कार्यालयमा शिष्टाचार भेटवार्ता सम्पन्न भएको छ।

भेटवार्ताका क्रममा दुई देशबीचको दीर्घकालीन मैत्रीपूर्ण सम्बन्ध, पारस्परिक हितका विषय तथा आगामी सहयोगका सम्भावनाहरूमाथि विचार-विमर्श भएको प्रधानमन्त्री कार्यालयले जनाएको छ।

प्रधानमन्त्री कार्कीले वर्तमान असामान्य परिस्थितिमा बनेको सरकारको मुख्य प्राथमिकता सुशासन प्रवर्द्धन र तोकिएको समयमै स्वच्छ तथा भयरहित वातावरणमा निर्वाचन सम्पन्न गराउने रहेको स्पष्ट गरिन्। उनले जनताको विश्वास प्राप्त गर्न सरकार पूर्ण रूपमा प्रतिबद्ध रहेको बताइन्।

यस अवसरमा दुवै पक्षले नेपाल–बेलायत सम्बन्ध ऐतिहासिक कालदेखि नै सौहार्दपूर्ण रहेको र भविष्यमा अझ सुदृढ बनाउने इच्छाशक्ति व्यक्त गरेका थिए।

बेलायती राजदूत फेनले प्रधानमन्त्री कार्कीलाई सफल कार्यकालको शुभकामना दिँदै आगामी निर्वाचनलाई निष्पक्ष र शान्तिपूर्ण ढंगले सम्पन्न गर्न आवश्यक सहयोगका लागि बेलायत सरकार सधैँ तयार रहेको बताए।