जेनजीसहित वैकल्पिक शक्तिबीच एकता गर्न विवेकशील साझाको आह्वान

काठमाडौं । विवेकशील साझा पार्टीले जेनजीसहित वैकल्पिक राजनीतिक शक्तिहरुबीच वृहत एकताका लागि आह्वान गरेको छ ।

पार्टीका प्रवक्ता आशुतोष प्रधानले विज्ञप्ति जारी गर्दै समृद्ध नेपालका निम्ति वैकल्पिक राजनीतिक शक्ति, नयाँ दल, जेनजी आन्दोलनका अभियन्ता एवं समूह तथा सार्वजनिक परिचय बनाएका व्यक्तिहरुसँग सहकार्य, ध्रुवीकरण, कार्यगत एकता र बृहत्तर एकीकरण गर्न सबै ढोकाहरु खुला गरेको जनाएका हुन् ।

विज्ञप्तिमा भनिएको छ, ‘सबै प्रकारका खुला छलफल, बहस र बृहत्तर नयाँ शक्ति निर्माण गरेर अघि बढ्न सरोकारवाला सम्पूर्णमा सार्वजनिक आह्वान गर्दछ ।’

२१ फागुनमा घोषणा गरिएको चुनावमा सहभागी हुने घोषणा गर्दै विवेकशील साझाले जेनजी विद्रोहलाई ऐक्यवद्धता जनाउँदै त्यसकै जगमा बनेको प्रधानमन्त्री सुशीला कार्की नेतृत्वको सरकारलाई स्वागत गर्दै सहयोग गरेर अघि बढ्ने प्रतिबद्धता पनि गरेको छ ।