सरकारले नसुनेपछि शिक्षक महासंघद्वारा आम शैक्षिक हड्ताल घोषणा

काठमाडौं । पाँच दिनदेखि शिक्षा ऐन जारी गर्नेलगायतका माग पूरा गराउन शान्तिपूर्ण ढंगले काठमाडौं केन्द्रित आन्दोलन गर्दैआएको शिक्षक महासंघले सरकारले सम्बोधन नगरेपछि आम शैक्षिक हड्ताल घोषणा गरेको छ ।

महासंघको आह्वानमा देशभरका शिक्षकहरु काठमाडौंमा आन्दोलनरत रहेका छन् । तर सरकारले उनीहरुको माग सुनुवाइ गरेको छैन । आफ्ना माग सुनुवाइ नभएपछि नेपाल शिक्षक महासंघले चैत २५ गतेदेखि शैक्षिक हड्ताल घोषणा गरेको छ ।

महासंघका अध्यक्ष लक्ष्मीकिशोर सुवेदी र महासचिव तुलाबहादुर थापाले संयुक्त रुपमा विज्ञप्ति जारी गरी देशभरका सबै विद्यालयहरु बन्द गरी काठमाडौंको सडक आन्दोलनमा अनिवार्य सहभागी हुन आह्वान गरेका छन् ।
गुणस्तरीय विद्यालय शिक्षा, विद्यार्थी र शिक्षक–कर्मचारी मैत्री विद्यालय शिक्षा ऐन जारी गर्नुपर्ने माग राख्दै महासंघको नेतृत्वमा देशभरका शिक्षकहरु २०८१ माघ २० गदेखि निरन्तर आन्दोलनमा छन् ।

यसैक्रममा उनीहरुले चैत १९ गतेदेखि काठमाडौंमा प्रदर्शन गर्दै आएका छन् । उनीहरुले यसलाई शिक्षा ऐन जारी गराउने सवालमा ‘अन्तिम र निर्णायक आन्दोलन’ भनेका छन् ।

नेपाल शिक्षक महासंघको राष्ट्रिय समितिद्वारा जारी विज्ञप्तिमा भनिएको छ, ‘यो आन्दोलनलाई सशक्त बनाउन २०८१ चैत २५ गतेबाट आम शैक्षिक हड्तालको घोषणा गरिएको छ । अब देशभरको सबै विद्यालय बन्द गरी काठमाडौंको शैक्षिक सडक आन्दोलनमा सहभागी हुन अनिवार्य आउन हामी सबै शिक्षक–कर्मचारी साथीहरुलाई आग्रह गर्दछौं ।’

महासंघले आन्दोलनको अवधिमार उत्तरपुस्तिका परीक्षण, नतिजा प्रकाशन, तालिम गोष्ठी, सेमिनार, शैक्षिक भ्रमण जस्ता कुनै पनि काममा संलग्न नहुन पनि आग्रह गरेको छ ।

संविधान जारी भएको ९ बर्ष बितिसक्दा पनि सरकारले शिक्षा ऐन जारी गर्न सकेको छैन । शिक्षा ऐन जारी गर्न शिक्षकहरुले पटक–पटक माग गर्दा पनि सरकारले बेवास्ता गर्दैआएपछि शिक्षकहरु अहिले निर्णायक आन्दोलन गर्न काठमाडौंमा आएका छन् ।