प्रधानमन्त्रीसँग भेटेपछि पनि शिक्षक आन्दोलन रोकिएन, आज पनि माइतीघरमा प्रदर्शन

काठमाडौँ । शिक्षक महासंघले जारी प्रदर्शनलाई आज पनि निरन्तरता दिने भएको छ । शुक्रबार बेलुका प्रधानमन्त्री केपी ओलीसँग भेटेपछि शिक्षक आन्दोलन रोकिने अपेक्षा गरिए पनि शिक्षक नेताहरुले आन्दोलनलाई निरन्तरता दिने बताएका छन् । शिक्षक महासंघका अध्यक्ष लक्ष्मीकिशोर सुवेदीले समग्र परिस्थितिको मूल्यांकन गर्दा अझै आन्दोलनको मोर्चा डटिरहनुपर्ने अवस्था आएको उल्लेख गरेका छन् ।

महासंघका नेता र प्रधानमन्त्री ओलीबीच शुक्रबार भएको छलफलमा चालु आन्दोलन, शिक्षक–कर्मचारीका माग मुद्दा र विद्यालय शिक्षा ऐन जारी गर्ने सम्बन्धमा आफ्ना धारणा प्रस्ट पार्ने काम भएको शिक्षक नेताहरुले बताएका छन् ।

प्रधानमन्त्री ओलीले सरकारले सम्बोधन गर्नसक्ने मागबारे सल्लाह गरेर निर्णय लिने तथा ऐन जारी गर्न तदारुकता देखाएपछि शुक्रबारै सभामुख देवराज घिमिरेसँग पनि शिक्षक महासंघको नेतृत्वले भेट गरेको थियो । सभामुखसँग ऐन छिटो जारी गर्नेबारेमा छलफल भएको बताइएको छ ।

शिक्षक महासंघका नेताहरुले प्रधानमन्त्री र सभामुखसँग भएका छलफलका बारेमा आज हुने विरोध प्रदर्शनमा जानकारी गराउने भएका छन् ।