काठमाडौं । बेलायतबाट आएका ५ जनामा कोरोना भाइरस (कोभिड–१९) को संक्रमण पुष्टि भएसँगै नेपालमा पनि कोरोनाको नयाँ रुप भित्रिएको हो कि भन्ने आशंका पैदा भएको छ ।
यस अघि बेलायतमा नयाँ प्रकारको कोरोना भाइरस भेटिएको थियो ।
बेलायतमा नयाँ प्रकारको कोरोना भाइरस भेटिए पनि नेपाल सरकारले भने नेपाल आउनेहरुलाई रोक्न सकेको छैन । जसले गर्दा नयाँ प्रकारको कोरोना भाइरस नेपाल भित्रन सक्ने सम्भावन उत्तिकै छ ।
यस अघिको तथ्यांक हेर्ने हो भने पनि नेपालमा विदेशबाट आएकाहरुबाट नै कोरोना भाइरस भित्रिएको थियो ।
हुनत सरकारले बेलायतबाट आउने नागरिकलाई १० दिन अनिवार्य क्वारेण्टिन बस्न आग्रह गरेको छ ।
तर, क्वारेन्टिनमै बसेकामध्ये ५ जनालाई लक्षण देखिएपछि परीक्षण गर्दा उनीहरूको रिपोर्ट पोजेटिभ आएको हो ।
यद्यपि उनीहरुमा नयाँ प्रकारको कोरोना भाइरस हो वा होइन भन्ने यकिन भइनसकेको इपिडिमियोलोजी तथा रोग नियण्त्रण महाशाखा (इडिसिडी) ले जनाएको छ ।
इडिसिडीका निर्देशक वासुदेव पाण्डेका अनुसार उनीहरुमा नयाँ किसिमको कोरोना भाइरस भएको पत्ता लगाउन जिन सिक्विनिङ गर्नुपर्ने हुन्छ ।
तर, इडिसिडीलले बेलायतबाट आएकाहरु अथवा उनीहरुको सम्पर्कमा आएकाहरुलाई सचेत रहन आग्रह भने गरेको छ ।
