बारामा तस्करी बढ्यो, दुई घुमुवा तानिए

कलैया । बारा जिल्लामा नेपाल प्रहरी र सशस्त्र प्रहरीको मिलेमतोमा दैनिक लाखौँका सामान भन्सार छलेर तस्करहरूले बिभिन्न नाकाहरूबाट नेपाल भित्र्याउने गरेका छन् ।
बाराका बलिरामपुर, मुसहर्वा, छतवा, सिम्रौनगढ, कवही, अमवा, देवापुर, दक्षिणको झिट्कैयाबाट कपडा, मदिरादेखि विभिन्न सामानको ब्यापक तस्करी हुँदैआएको छ ।

मुना साह कलवार, बाबुलाल, सरोज श्रीवास्तव, सन्तोष लगायत १४ जनाको टिमले सशस्त्र र प्रहरीकै सेटिङमा कपडाको ब्यापक तस्करी गर्दैआएका छन् । यी नाकाहरूबाट अवैध रुपमा लत्ताकपडा, काजु, कस्मेटिक सामान, चिनी, सूर्ती, रजनीगन्धा, पान परागलगायतका सामानहरू तस्करहरूले भारतबाट भन्सार छलेर नेपाल भित्र्याइरहेका छन् ।

मलेसियादेखि नेपालका पर्सा र बारामा हुन्डीको अरबौंको कारोबारको सााम्राज्य चलाउँदैआएका राकेश कुशवाहालाई सेटिङमा मुद्दा कमजोर बनाएर उन्मुक्ति दिइएको थियो । तस्करी बढेको गुनासोपछि प्रहरी मुख्यालयले घुमुवा सहायक हवल्दार धिरज पटेल र जवान आनन्द दासलाई मंगलबारै प्रहरी प्रधान कार्यायलमा तानेको छ ।

यसैगरी, राकेश महतोको समूहको हुन्डी कारोबारमा २०८० चैत २० मा छापा हानी साढे १३ लाख नगद र दैनिक कम्तीमा साढे ३ करोड रुपैयाँको कारोबार हुने गरेको फेलापारेको थियो । कुशवाहाको गिरोहबाट दैनिक साढे ३ करोडको अबैध हुन्डी कारोबार भएको मोबाइल र खातापाता बरामद गरेको थियो । कुशवाहको गिरोहले मलेसियामा कार्यरत नेपाली युवाहरुको पैसा मलेसियन रिंगेट नेपाल जान नदिई चीन पठाउने र सोबापत भारतीय ब्यापारीहरुले अर्डर गरेको सामान भारत पठाउने गथ्र्यो ।