सिन्धुली । जिल्ला प्रहरी कार्यालय सिन्धुलीले १४ वर्षीया बालिकालाई बलात्कार गरेर फरार रहेका एक जनालाई पक्राउ गरेको छ । पक्राउ पर्नेमा सिन्धुलीको दुधौली नगरपालिका-२ गागनका ४२ वर्षीय हेमबहादुर वम्जन रहेका छन् ।
बालिकालाई अपहरण गरी बेपत्ता बनाएको भन्दै पीडित परिवारले दिएको उजुरीका आधारमा वम्जनलाई पक्राउ गरिएको जिल्ला प्रहरी कार्यालय सिन्धुलीका प्रहरी नायब उपरीक्षक श्यामबहादुर खत्रीले जानकारी दिए ।
भदौ १२ गते गोठालो गएको समयमा वम्जनले बालिकालाई बलात्कार गरेको पीडित परिवारले जनाएको छ । प्रहरीका अनुसार भदौ १२ गते बलात्कार गरी फरार रहेका वम्जनले मंसिर ३ गते बालिकालाई नियन्त्रण लिएर वेपत्ता बनाएका थिए ।
उनैले दिएको सूचनाका आधारमा बालिकालाई बारा जिल्ला निजगढ नगरपालिका ११, रतनपुरबाट प्रहरीले सकुशल उद्धार गरिसकेको छ । यसबारे थप अनुसन्धान भइरहेकाे प्रहरीले जनाएकाे छ ।
