रवि लामिछाने हिरासतमा सुतेको फोटो सार्वजनिक गर्ने डा. भुसाल पक्राउ

काठमाडौं – राष्ट्रिय स्वतन्त्र पार्टी (रास्वपा) सभापति रवि लामिछाने हिरासत कक्षमा सुतिरहेको फोटो खिचेर सार्वजनिक गर्ने डा।निकोलस भुसाल पक्राउ परेका छन् । कास्की प्रहरीको हिरासत रहेका लामिछानेको सुतेको फोटो सार्वजनिक गरेपछि सुरक्षाको सवत्र आलोचना भैरहेको अवस्थामा भुसाललाई आइतबार साँझ काठमाडौं उपत्यका अपराध अनुसन्धान कार्यालयको टोलीले थलीबाट पक्राउ गरेको हो ।

डा. भुसाललाई थप अनुसन्धानका लागि आज (सोमबार) पोखरा पठाइँने अपराध अनुसन्धान कार्यालय प्रमुख सानुराम भट्टराईले जानकारी दिए । भुसालले लामिछानेको फोटो आफूले प्रहरीको सीसीटीभीबाट खिचेको स्वीकारिसकेका छन् । गएको शनिबार भेट्न जाँदा लामिछाने सुतिरहेका बेला प्रहरीको सीसीटीभीमा देखेपछि आफूले फोटो खिचेको भुसालले बताएका छन् ।

लामिछाने पक्राउ परेदेखि कास्की प्रहरीले कार्यालयमा कुनै पनि प्रयोजनका लागि आउने सेवाग्राहीलाई मोबाइल लैजान रोक लगाएको बताइएपनि भुसालले प्रहरीको गेटभित्रै रहेको सिसिटीभीमा लामिछाने सुतेको देख्नासाथ फोटो खिचेको बताइएको छ । मोबाइलबाट खिचेको फोटो आफूले फेसबुकमा पोस्ट गरेपछि रास्वपा कार्यकर्ताले भाइरल बनाएको थियो ।