डीएसपीलाई मुख छाड्ने गिरीको दोहोरीमा पूर्वआईजीपी खनाल छमछमी नाचे

काठमाडौं । ज्ञानेन्द्र शाहीको अभियान हुँदै एमालेबाट २ पटक सांसदमा उम्मेदवार भई पराजीत भएका पूर्वआईजीपी सर्वेन्द्र खनाल एक विवादास्पद ब्यवसायीको दोहोरीमा छमछमी नाचेको भिडियो सार्वजनिक भएको छ ।

जमलमा रहेको अशोक गिरीको दरबार रोधीघरमा बुधबार राति पूर्वआईजी खनाल नाचेको लाइभ भिडियो सार्वजनिक भएको छ । उक्त रोधीघरका संचालक अशोक गिरीले नै खनाल नाचेको लाइभ भिडियो फेसबुकमा सेयर गरेका छन् । गिरी तिनै हुन्, जसले गएको माघमा दोहोरीमा आउने ग्राहकसँग अत्यधिक महंगो बिल असुली गरेको बिषयमा दरबारमार्ग प्रहरी बृत्तमा उजुरी परेपछि डीएसपी गोविन्द थापालाई मुख छाडेका थिए । ६ हजारको बिललाई ६० हजार बनाएर ठगी गरेको बिषयमा बोलाउँदा डीएसपीलाई मुख छाड्ने गिरीलाई दरबारमार्ग बृत्तले ४ दिन हिरासतमा राखेको थियो । उनले डीएसपी थापालाई सरुवा गरिदिने धम्की फोनमार्फत् दिएका थिए ।

जमलको मायालु सेन्टरमा दरबार रोधीघर संचालन गर्दैआएका गिरीले गुण्डागर्दीसमेत गर्ने गरेको उजुरी परे पनि उच्चतहका भूपू तथा बहालवाला प्रहरी अधिकृतहरुसँगको पहुँच देखाएर उनले उन्मुक्ति पाउँदैआएका छन् । दोहोरीको टेबुलमा ग्राहकसँग युवती बसाउने र ठग्ने गरेको उजुरी प्रहरीमा परे पनि पहुँचका आधारमा उनी जोगिंदैआएका छन् ।
गिरीले प्रहरीका हाकिमहरुसँगको पहुँच देखाएर मिटरब्याजमा लगानी गर्दैआएका छन् । प्रहरीकै हाकिमहरुले समेत उनीमार्फत् मिटरब्याजमा लगानी गर्ने गरेको स्रोत बताउँछ ।

मिटरब्याजको कारोबारमा संलग्न गिरी राजनीतिक नेताहरुको समेत संरक्षणमा रहेका छन् । उनले दोहोरीमा आउने ग्राहकसँग दस गुणा बढी असुल्ने र मिटरब्याजको धन्दाबाट आर्जित ५ करोड भन्दा बढी लगानीमा कतारमा गजल रेष्टुरेन्ट समेत खोलेका छन् । अबैध हुन्डीमार्फत् नेपालबाट कतारमा रकम लगेर उनले उक्त रेष्टुरेन्ट खोलेका छन् । अबैध रुपमा काठमाडौंका विभिन्न ठाउँमा जुवा खेल्नेहरुलाई गिरीले मिटरब्याजमा पैसा दिने गरेको बिषय त यसअघि पनि सार्वजनिक भइसकेको छ ।

उच्च प्रहरी अधिकारीको पहुँच देखाउँदै मिटरब्याजको कारोबार गर्दैआएका गिरीले उपत्यका अपराध अनुसन्धान कार्यालयका प्रमुख (एसएसपी) सानुराम भट्टराईको नाम समेत लिने गरेका छन् ।