प्रदीपजंग केसी रथीमा बढुवा

काठमाडौं – नेपाली सेनाका उपरथी प्रदीपजंग केसी बलाध्यक्ष रथीमा बढुवा भएका छन् । नेपाली सेनाको सिफारिसमा केसीलाई बिहीबारको मन्त्रिपरिषद बैठकले उनलाई रथीमा बढुवा गरेको हो ।

अशोकराज सिग्देल प्रधानसेनापतिमा नियुक्त भएपछि गत भदौदेखि नेपाली सेनाको एक रथी पद रिक्त थियो । दुई जना रथीको दरबन्दी रहेकोमा निर्मलकुमार थापा मात्रै कार्यरत थिए ।

झण्डै दुई महिना रिक्त पदमा सिनियर उपरथी केसीलाई बढुवा गर्न सिफारिस गरिएको थियो । त्यसअघि उजुरीका लागि सात दिने सूचना निकालिएको थियो । तर कुनै उजुरी नपरेपछि बढुवा सिफारिस समितिले रक्षा मन्त्रालयमा बढुवाका लागि पठाएको थियो । केसी हाल मध्य पृतना हेटौँडाका पृतनापति समेत थिए । रथीमा बढुवा भएसँगै केसी २०८३ मंसिर १५ गतेसम्म सैनिक सेवामा रहने छन् ।

त्यसपछि उनी रथीको ५८ वर्षे उमेर हदका कारण अनिवार्य अवकास हुनेछन् ।