आज उपत्यकामा सुरक्षा व्यवस्था कडा, ५ हजार प्रहरी र ५ सय ट्राफिक खटिदै

काठमाडौं – आज काठमाडौं उपत्यकाको सुरक्षा व्यवस्था कडा पारिएको छ । विभिन्न तीन समुहले आज काठमाडौंमा एकसाथ प्रदर्शन गर्ने भएपछि जिल्ला प्रहरी कार्यालय काठमाडौंले सुरक्षा व्यवस्था कडा पारेको हो ।

सहकारी पिडितको माइतीघरमा, मेडिकल व्यवसायी दुर्गा प्रसाईँ समूहले काठमाडौंको कोटेश्वरमा र नेकपा एमालेले दरबारमार्गमा जागरण सभाका गर्दै छ । एकैदिन तीन ठाउँमा फरक फरक समूहको प्रदर्शन हुने भएपछि काठमाडौंको सुरक्षा व्यवस्था कडा पारिएको हो।

काठमाडौंका प्रमुख जिल्ला अधिकारी जयनारायण आचार्यका अनुसार तीन ठाउँमा प्रदर्शन हुन लागेकाले आम नागरिकको जनजीवन सहज र सुरक्षित बनाउन शुक्रबार ५ हजार भन्दा बढी प्रहरी खटाइने जानकारी दिए। त्यस्तै ट्राफिक व्यवस्थापन सहज बनाउन ५ सयभन्दा बढी ट्राफिक प्रहरी खटाइने पनि उनले बताए।

नागरिकको जनजीवन तथा आवतजावत सहज र सुरक्षा विषयमा प्रतिबद्ध रहेको उनले बताए । त्यसमा नेपाल प्रहरी र सशस्त्र प्रहरी बल पनि खटिनेछन्। त्यसका लागि काठमाडौंमै पर्याप्त प्रहरी रहेको पनि उनले बताए। सुरक्षा संवेदनशीलता र यातायातलाई मध्येनजर गरेर नै प्रदर्शन गर्ने ठाउँको दूरी टाढा बनाइएको पनि प्रजिअ आचार्यले बताए।