सशस्त्रका घुमुवा हटाइए, प्रहरीका घुमुवालाई डीआईजीकै संरक्षण

बिराटनगर । जिल्ला प्रहरी कार्यालय मोरङ मातहत रंगेली इलाका प्रहरी कार्यालयबाट सादा पोशाकका घुमुवा परिचालन गरी तस्करीको लाइन दिएको समाचार नेपालफेस डटकमले गएको असोज ५ मा उजागर गरेपछि सशस्त्र प्रहरीले सई सुवास गिरीसहितलाई हटाएको छ । तर नेपाल प्रहरीले भने १० बर्षदेखि प्रायः मोरङमा सादा पोशाकमा परिचालित सई भुवन श्रेष्ठलाई यथावत राखेको छ ।

सई श्रेष्ठको दरबन्दी धनकुटामा भएको र काजमा मोरङमा बसी तस्करहरुसँग उठौती गर्दैैआएको समाचार उजागर भएपछि पनि कोशी प्रदेश प्रहरी कार्यालयका डीआईजी चन्द्रकुवेर खापुङले उनलाई चलाउन आवश्यक नठानेपछि तस्करीको भागबण्डा उनीसम्म पुग्ने गरेको आशंका गर्न थालिएको छ । एसपी नवराज कार्कीमात्र होइन, डीआईजी खापुङकै संरक्षणमा घुमुवा सई श्रेष्ठले मोरङको पूर्वी क्षेत्रका रंगेली, डुमरिया र सिजुवाबाट चिनीदेखि किराना तस्करीको लाइन दिएर मासिक मोटो रकम उठाउने गरेको आरोप लाग्दैआएको छ ।

आईजीपी बसन्तबहादुर कुँवरले दरबन्दीमा पठाऊ अभियान डीआईजी हुँदा सुरु गरेका थिए । तर, आफैंले सुरु गरेको अभियानबिपरीत १० बर्षदेखि काजमा घुमुवा बसेका सई भुवन श्रेष्ठहरुलाई भने दरबन्दीमा पठाइएको छैन ।
सई श्रेष्ठले चिनी विनोद केशरी र मनु शाहको सेटिङमा चिनी तस्करीको लाइन दिने गरेका छन् ।

एसपी कार्कीले मातहतका कार्यालयबाट मोरङका पूर्वी क्षेत्रको मुख्य सीमा नाकाहरु हेर्ने इलाका प्रहरी कार्यालय रंगेलीबाट सई श्रेष्ठको नेतृत्वमा घुमुवा परिचालन गरेका छन् ।

यी तीनै क्षेत्रबाट चिनीको बढी तस्करी हुँदैआएको छ । चिनीदेखि हार्डवेयर, किराना लगायतको तस्करी पनि हुने गरेको छ । एसपी कार्कीले रंगेलीमा काजमा राखी घुमुवाका रुपमा श्रेष्ठको नेतृत्वमा ३ जनालाई घुमुवा खटाएका छन् । सई श्रेष्ठले डीआईजी खापुङलाई समेत तस्करीको सेटिङको भागबण्डा पुर्याएका कारण उनलाई काजमा बसी राज गर्ने छुट दिइएको छ ।

डीआईजी राजेश बाँस्तोलाको कार्यकालमा उनका र एसपीका पनि घुमुवाका रुपमा परिचालित श्रेष्ठको बारेमा आईजीपी बसन्तबहादुर कुँवरकोमा गुनासो पुगेको थियो । गुनासोपछि आईजीपी सचिवालयको निर्देशनमा उनको काजसरुवा संखुवासभा जिल्ला प्रहरी कार्यालयमा भएको थियो ।

३–४ महिना संखुवासभा दरबन्दी राखे पनि त्यहाँका डीएसपीलाई भनेर बास्तोलाले मोरङमै राखेका थिए । बास्तोला सरुवा भएपछि पुरानो मिति राखेर श्रेष्ठले धनकुटामा सरुवा मिलाएका थिए । केही महिनादेखि उनलाई धनकुटाबाट फेरि काजमा मोरङको रंगेली ल्याइएको छ । अनुभवी भएकाले श्रेष्ठलाई रंगेलीमा काजमा ल्याएर घुमाउरो बाटोबाट डीआईजी खापुङ र एसपी कार्कीले घुमुवाका रुपमा परिचालन गरेका छन् ।