सरकारी छाप र जरायोको सिङसहित नेविसंघका नेता पक्राउ

काठमाडौं । सरकारी छाप र जरायोको सिङसहित नेविसंघका नेतासहित तीन जना पक्राउ परेका छन् । पोखराको महेन्द्रपुलस्थित ब्लु ह्वेल होम डेकोरबाट छाप र जरायोको सिङसहित उनीहरूलाई प्रहरीले पक्राउ गरेको हाे ।

वडा प्रहरी कार्यालय बैदाम र लागूऔषध नियन्त्रण ब्युरो पोखराको टोलीले पृथ्वीनारायण क्याम्पस पोखराका नेविसंघका पूर्व सभापति सलिश (सतिश) बास्तोलासहित सुजन गिरी र विवेक श्रेष्ठलाई नियन्त्रणमा लिएको हाे ।

उनीहरूको साथबाट छाप बनाउन प्रयोग भएको मेसिन, मनिटर र सिपियु बरामद गरिएको प्रहरीले जनाएको छ । सरकारी कागजात किर्ते गर्ने गतिविधि गरेको आशंकासहित उनीहरूमाथि प्रहरीले अनुसन्धान सुरु गरेको छ ।

उनीहरूलाई कास्की जिल्ला अदालतबाट लिखतसम्बन्धी कसुरमा १० दिन म्याद थपेर अनुसन्धान सुरु भएको प्रहरीले बताएको छ ।