बाँसबारी जग्गा प्रकरण: अरुणलाई अदालतले रिहा गरेकोमा गृहमन्त्री असन्तुष्ट, भने – आदेश इतिहासकै अनौठो

काठमाडौं । गृहमन्त्री नारायणकाजी श्रेष्ठले काठमाडौँको बाँसबारी जग्गा प्रकरणमा पक्राउ परेर रिहा भएका व्यापारी अरुण चौधरीलाई छाड्ने अदालतको आदेशप्रति असन्तुष्टि व्यक्त गरेका छन् ।

आज संसद्को राज्य व्यवस्था समितिको बैठकमा जवाफ दिँदै श्रेष्ठले त्यस्तो असन्तुष्टि व्यक्त गरेका हुन् । उनले जिल्ला अदालतको उक्त आदेश इतिहासकै अनौठो र पहिलो भएको पनि बताए ।

‘हामीले म्याद माग्यौं, अदालतले दुई दिनमात्र दिन सक्छ, त्यसपछि सीआईबीको काम हो अनुसन्धान गर्ने । त्यसपछि म्याद थप चाहियो भन्न पनि सक्छ, चाहिँदैन भन्न पनि सक्छ । चाहियो भनेर गएपछि म्याद दिने कि नदिने अदालतले निर्णय गर्न सक्छ’, उनले भने, ‘अदालतले पहिला नै दुई दिनभित्र सक अनुसन्धान त्यसपछि छोडिदेऊ भनेर पुलिस अधिकारीलाई निर्देश्न दिने अहिलेसम्मको न्यायिक इतिहासमा छैन, यो पहिलो हो ।’