क्यानडाले दियो नेपाललाई २८६ रनको लक्ष्य

काठमाडौं । ओपनर आरोन जोन्सनको अर्धशतकप्रेरित क्यानडाले एकदिवसीय शृंखलाको दोस्रो खेलमा जितका लागि नेपाललाई २८६ रनको लक्ष्य दिएको छ ।

आज (शनिबार) कीर्तिपुरस्थित त्रिवि क्रिकेट मैदानमा जारी खेलमा टस जितेर ब्याटिङमा आएको क्यानडाले निर्धाति ५० ओभरमा नौ विकेट गुमाएर २८५ रनको योगफल खडा गरेको हो ।

क्यानडाका ओपनर जोन्सनले सर्वाधिक ६५ रन बनाए । उनले ६२ बलमा १० चौका र दुई छक्का प्रहार गरे । जोन्सनले पहिलो विकेटका लागि अर्का ओपनर नवतिन धलिवालसँग १८.२ ओभरमा ९४ रनको साझेदारी गर्दै क्यानडालाई उत्कृष्ट सुरुआत दिलाएका थिए । धलिवालले ६० बलमा आठ चौकासहित ४६ रन बनाए ।

यसबाहेक, श्रेया मोभाले ४० र पर्गत सिंहले ३८ रन थपे । निकोलस किर्टोन र उदय भगवानले समान २० रन जोड्दा दिलप्रिति बाज्वाले १९ र साहिद अहमदजाईले १३ रन बनाए ।

क्यानडाबाट क्याटिङका लागि आएको १० जनामध्ये आठ ब्याटरले दोहोरो अंकमा रन जोडे ।

नेपालका कप्तान रोहितकुमार पौडेल र कुशल मल्ले समान दुई विकेट लिए । यसबाहेक, सोमपाल कामी, सूर्य तामाङ, पवन सर्राफ र ‘डेब्यूट्यान्ट’ आकाश चन्दले समान एक विकेट लिए ।

नेपाली सिनियर राष्ट्रिय टिमबाट पहिलो खेल खेलेका आकाशले पाँच ओभरमा ३१ रन खर्चिए ।

त्यस्तै तीन खेलको एकदिवसीय शृंखलाका लागि नेपाल भ्रमणमा रहेको क्यानडाले शृंखलामा १–० ले पछि छ । यसअघि बिहीबार भएको पहिलो खेलमा नेपालले क्यानडाविरुद्ध सात रनको जित निकालेको थियो ।