हामीले ओलीलाई संसद् विघटन नगर्नुस् भनेका थियौँः उपमहासचिव पुन

काठमाडौं। नेकपा माओवादी केन्द्रका उपमहासचिव वर्षमान पुनले तत्कालीन प्रधानमन्त्री केपी शर्मा ओलीलाई संसद् विघटन नगर्न आफूले रोक्न खोजेको बताएका छन् ।

आज मधेस प्रदेशको राजधानी जनकपुरस्थित महेन्द्र नारायण निधि स्मृति प्रतिष्ठानमा आयोजित राष्ट्रियसभाका लागि सत्ता गठबन्धनले खडा गरेका उम्मेदवार र मतदाताबिचको अभिमुखीकरण कार्यक्रममा पुनले आफूले ओलीलाई संसद् विघटन नगर्न आग्रहसहित रोक्ने प्रयास गरेको बताएका हुन् ।

ओलीले आफैँले स्वामित्व लिएको संविधानको मर्म र भावना तथा नेपाली जनताको १०औँ हजारको बलिदानबाट स्थापित गणतन्त्र, संघीयता, समावेशिता, धर्मनिरपेक्षता सामाजिक न्यायलगायतका शासन प्रणालीका आधारहरुमाथि प्रहार गरेका कारण आफूहरु सरकारबाट बाहिरिएको उनको भनाइ छ ।

‘संसद् विघटनको निर्णय गर्ने क्याबिनेटमा म आफैँ थिएँ । मसहित केही साथीहरुले त्यतिखेरका प्रधानमन्त्रीलाई नेपाली जनताको १०औँ हजारको बलिदानबाट स्थापित गणतन्त्र, संघीयता, समावेशिता, धर्मनिरपेक्षता सामाजिक न्याय लगायतका शासन प्रणालीका आधारहरुमाथिको प्रहार र घात हुने गरी संसद् विघटन नगर्नुस् भनेका थियौँ’, पुनले भने, ‘उहाँले मान्नुभएन र संसद् विघटन गर्नुभयो ।’