बागलुङमा जिप पल्टिँदा चालकसहित २ को मृत्यु

बागलुङ। बागलुङको ढोरपाटन घुम्न हिँडेका यात्री बोकेको जिप सडक छेउमा पल्टिँदा चालकसहित दुई जनाको ज्यान गएको छ । शनिबार बिहान बुर्तिबाङदेखि ढोरपाटन जाँदै गरेको जिप ढोरपाटन नगरपालिका-५ को प्याङखोलामा जिप दुर्घटना भएको हो ।

ध १ ज १९ नम्बरको जिप खस्दा ढोरपाटन नगरपालिका-४ का चालक तिलक घर्ती र काठमाडौं जिल्ला चन्द्रागिरी नगरपालिका-५ की २८ वर्षीया संगीता अधिकारीको घटनास्थलमै मृत्यु भएको प्रहरी निरीक्षक दिपकबाबु केसीले बताए ।

जिपमा सवार ९ जना घाइते भएका छन् । उनीहरू सबै काठमाडौंको चन्द्रागिरीकै हुन् । उनीहरु मध्ये ६ जनाको अवस्था गम्भीर रहेको छ । उनीहरूलाई प्राथमिक स्वास्थ्य केन्द्र बुर्तिबाङमा उपचार भइरहेको छ ।

थप उपचारका लागि अन्यत्र पठाउने तयारी भएको केसीले जानकारी दिए ।