मुख्यमन्त्रीले प्रदेशको नामनै छुटाएर शुभकामना दिएपछि…

विराटनगर । कोसी प्रदेशका मुख्यमन्त्री केदार कार्कीले आज ‘तमु ल्होसार’को सन्दर्भमा दिएको शुभकामना सन्देशले पहिचानवादी खुसी भएका छन् । मुख्यमन्त्री तथा मन्त्रिपरिषद्को कार्यालयबाट आइतबार जारी शुभकामना सन्देशमा प्रदेशको नाम कोसी छुट्न गएको थियो ।

कोसी प्रदेशका मुख्यमन्त्री कार्कीले दिएको तमु ल्होसारको शुभकामना वक्तव्यमा ‘कोसी’ नाम उल्लेख नभएको भन्दै आलोचना भएको छ । तर, पहिचानवादीहरूले भने कार्कीको प्रशंसा गर्दै सामाजिक सञ्जालमा धन्यवाद दिएका छन् ।

वक्तव्यको वायाँतर्फ ‘मुख्यमन्त्री’ र दायातर्फ ‘विराटनगर नेपाल’ उल्लेख छ । एमाले निकट नेता तथा कार्यकर्ताहरूले यसको व्यापक आलोचना गरिरहेका छन् ।

एमालेकी संघीय सांसद सुनिता बरालले आफ्नो फेसबुकमा “मुख्यमन्त्रीज्यू यो तुरुन्तै सच्याउनुस् र माफी माग्नुस् । नाम परिवर्तन गर्ने नियत भए, प्रक्रिया पढ्नुस अन्यथा पदका लागि यति निर्लज्जता शोभनिय हुँदैन” भन्दै स्टाटस लेखेकी छन् । पहिचान पक्षधरले कोसी नाम स्वीकार नगर्ने भन्दै आन्दोलन गरिरहेका छन् । उनीहरू संम्बद्ध नेताले कोसी नामबिनाको वक्तव्यको स्वागत गरेका छन् ।

उता, पहिचानवादी नेता अर्जुन जम्नेली राईले “हो यस्तो कोसी शब्दबिनाको शुभकामना मात्रै स्वीकार्य हुन्छ । धन्यवाद मुख्यमन्त्री कार्यालयलाई । कोही कोसी नाम मात्र स्थापित गर्न चाहन्छन् भने ती विखण्डनकारी, नश्लवालीहरू हुन्” भन्दै सामाजिक सञ्जालमा लेखेका छन् । गत वर्षको फागुन १७ गते प्रदेशसभाबाट कोसी नाम पारित भएको थियो ।

यता, मुख्यमन्त्री कार्यालयका प्रेस सल्लाहकार देवनारायण साहले प्राविधिक त्रुटि भएको भन्दै सच्याइएको बताएका छन् ।