३० वर्षदेखि फरार रहेका अभियुक्त पक्राउ

काठमाडौं । कर्तव्य ज्यान मुद्दामा अदालतले १० वर्ष सजाय सुनाएका अभियुक्तलाई प्रहरीले पक्राउ गरेको छ।

३० वर्षदेखि फरार रहेका अभियुक्त बारा सिम्रौनगढ नगरपालिका-७ का श्यामकिशोरप्रसाद कुशवाहलाई प्रहरीले पक्राउ गरेको हो।

उनलाई प्रदेश प्रहरी कार्यालय र इलाका प्रहरी कार्यालय सिम्रौनगढको टोलीले बुधबार पक्राउ गरेको हो। उनलाई नेपाल-भारत सिमाक्षेत्र सिम्रौनगढ-२ बाट पक्राउ गरिएको प्रहरी नायब महानिरीक्षक धीरजप्रताप सिंहले बताए।

सोही नगरपालिका-६ का जयमंगल प्रसादको २०४४ साल असोज १२ गते हत्या भएको थियो। सो हत्यामा बारा जिल्ला अदालतले २०४७ साल असोज २८ गते कुशवाहलाई १० वर्ष कैद सजाय सुनाएको थियो।