सांसद दाहालको घर निर्माण गर्न तस्करीको बालुवा बोकेको टिफर स्थानीयले प्रहरीलाई बुझाए

काठमाडौं । बिषयबस्तुको गहिराई नै नबुझी संसदमा चर्का भाषण गर्ने नेकपा माओवादी केन्द्रका सांसद राजन दाहालमाथि नदी दोहन गरिएको बालुवा तस्करी गरी घर बनाएको आरोप लागेको छ ।
सिन्धुली क्षेत्र नम्बर २ का सांसद लेखनाथ दाहाल उर्फ राजनले सिन्धुलीमाडीस्थित घर निर्माणका लागि तस्करीको बालुवा बोकेका टिफर र जेसीबी मरिण गाउँपालिकाका बासिन्दाले नियन्त्रणमा लिई प्रहरीलाई बुझाएका छन् ।

सिन्धुलीको मरिण गाउँपालिका प्रमुख बिमर्श मुक्तान प्रख्यातको प्रत्यक्ष संलग्नतामा सांसद दाहालको घर निर्माणका लागि तस्करीको बालुवा बोकेको टिफर र जेसीबी स्थानीयले नियन्त्रणमा लिई इलाका प्रहरी कार्यालय कपिलाकोटमा बुझाएको तस्वीर नै कुमार लामाले सामाजिक संजाल फेसबुकमा राखेका छन् ।

मरिण गाउँपालिका वडा न ४ का जनप्रतिनिधि स्थानीय बासिन्दाद्वारा बालुवा तस्करी गरिरहेको अवस्थामा उक्त २ थान गाडी नियन्त्रणमा लिई प्रहरीमा बुझाएको लामाले लेखेका छन् ।

सांसद दाहालले सिन्धुलीमाडीमा बनेको पार्टीको कार्यालय निर्माणको हिसाबकिताव समेत सार्वजनिक गर्न सकेका छैनन् । माओवादी पार्टीको भवन निर्माण गर्न कहाँ कहाँबाट कति आर्थिक सहयोग प्राप्त भयो, कति खर्च भयो ? त्यसको हिसाबकिताव समेत पारदर्शी नगरेका दाहालले संसदमा भने चर्का सुशासनका भाषण गर्ने गरेका छन् । पार्टी कार्यालय निर्माण गर्दाको आयब्यय देखाउन नसक्नुले त्यसमा भ्रष्टाचार भएको आशंका माओवादी बृत्तमा ब्याप्त छ ।