पोर्चुगल पठाइदिन्छु भनी ३ लाख रुपैयाँ ठग्ने युवक पक्राउ

काठमाडौं। पोर्चुगल पठाइदिन्छु भनी रकम ठगी गर्ने एक जना युवक पक्राउ परेका छन् । काठमाडौं उपत्यका अपराध अनुसन्धान कार्यालय मिनभवनबाट खटिएको प्रहरी टोलीले उनलाई आज सामाखुशीबाट पक्राउ गरेको हो ।

पक्राउ पर्नेमा प्युठान मल्लरानी ४ खलंगा घर भई काठमाडौंको सामाखुशी बस्ने नवराज खड्का रहेका छन् । उनले सन्दीप परियारलाई पोर्चुगल पठाइदिने प्रलोभनमा ३ लाख रुपैयाँ ठगी गरेको प्रहरीले बताएको छ ।

पक्राउ परेका खड्काले परियारलाई पोर्चुगल पठाउन १५ लाख रुपैयाँ लाग्ने र मासिक १ लाख ५० हजार कमाई हुने प्रलोभन देखाएको प्रहरीले जनाएको छ । खड्काविरुद्ध ठगी गरेको आरोपमा वैदेशिक रोजगार विभागमा उजुरी परेको थियो ।

सोही उजुरीका आधारमा विभागले उनलाई पक्राउ गरी उपस्थित गराइदिन प्रहरीलाइ पत्राचार गरेको थियो । पक्राउ परेका खड्कालाई थप अनुसन्धानका लागि वैदेशिक रोजगार विभागको कार्यालय ताहाचाल पठाइएको प्रहरीले जनाएको छ ।