मकवानपुर पहिरो अपडेट : १२ घण्टापछि एकको जीवितै उद्धार, अझै ५ जना बेपत्ता

काठमाडौं । अविरल वर्षापछिको पहिरोले घर बगाउँदा बेपत्ता भएका ६ जनामध्ये एक जनाको जीवितै उद्धार गरिएको छ । मकवानपुरको बागमती गाउँपालिका–५, सिक्रे दोभानमा पहिरोले अक्कलबहादुर स्याङ्तानको घर बगाउँदा बेपत्ता भएका १९ वर्षीय पासाङ घिसिङको करिब १२ घण्टापछि आज अपराह्न जीवितै उद्धार गरिएको हो ।

बागमती खोलाबाट प्रहरीको उद्धार टोलीले उनलाई जीवितै उद्धार गरेको जिल्ला प्रहरी कार्यालय मकवानपुरले जानकारी दिएको छ । उद्धार गरिएका उनलाई उपचारका लागि अस्पतालतर्फ पठाइएको प्रहरीले जनाएको छ ।

पहिरोमा परी अझै ५ जना बेपत्ता भएका छन् । बेपत्ता हुनेमा ५० वर्षीय अक्कलबहादुर स्याङ्तान, उनकी छोरी २२ वर्षकी शिला पहरी, पहरीका पति अन्दाजी २५ वर्षका जीवन पहरी, पहरीका छोरा अन्दाजी ४ वर्षका मिलन र करिब डेढ वर्षीया दिव्या पहरी छन् ।