१३ बर्षदेखि कार्यरत रैथाने उपसचिवको समान्य प्रशासनमा रजगजः सयौं कर्मचारीको सरुवा गोप्य राखियो ?

काठमाडौं । संघीय मामिला तथा सामान्य प्रशासन मन्त्री अमनलाल मोदीले २ बर्ष अवधि भन्दा बढी समय कार्यरत कर्मचारीको सरुवा गरेको प्रचारबाजी गर्न तल्लीन छन् । तर उनकै मन्त्रालयमा १३ बर्षदेखि कार्यरत उपसचिवलाई भने उनले चलाउन सकेका छैनन् । २०७२ को संविधान जारी हुनुअघि संघीय मामिला मन्त्रालयको नाम स्थानीय विकास मन्त्रालय थियो । स्थानीय विकास मन्त्राललय हुँदादेखिकै शाखा अधिकृत र उपसचिव पनि सामान्य प्रशासनमा कार्यरत छन् ।

मन्त्री मोदीले अरु मन्त्रालय अन्तर्गतका पहुँचबिहीन र अकूत कमाउन नसक्ने शाखा अधिकृत र उपसचिवलाई सरुवा गरेको भन्दै स्टन्टबाजी गरे पनि आफ्नै मन्त्रालयकालाई छुन सकेका छैनन् । निजामती सेवा नियमावली सामान्य प्रशासन मन्त्रालयका शाखा अधिकृत र उपसचिवलाई भने लागू नहुने हो ? यो प्र्रश्नको जवाफ मन्त्री मोदीले दिन सक्नुपर्ने मन्त्रालयका अधिकारी बताउँछन् ।

संघीय मामिला तथा  सामान्य प्रशासन मन्त्रालयमा कार्यरत उपसचिवहरुमा कमानसिंह थापा मगर बाहेक अरु सबै ३ बर्षभन्दा बढी समयदेखि कार्यरत छन् । तर मन्त्री मोदीले उनीहरुलाई सरुवा गर्न सकेका छैनन् । कतिपय उपसचिव त १३ बर्षदेखि सामान्य प्रशासन मन्त्रालयमै कार्यरत छन् । अरु निकायका सरुवामा पारदर्शीता अपनाएको दाबी गर्ने मोदीले आफ्नै मन्त्रालयभित्रको अपारदर्शीता हटाउन नसकेको आरोप छ । मन्त्री मोदीले २ बर्ष अवधि पुथेका ३४ जना, १४, २७ जना उपसचिव र शाखा अधिकृतहरुको सरुवा गाउँपालिका, नगरपालिका वा जिल्ला समन्वय समितिमा गरेको समाचार मिडियामा प्रचार गराउने गरेका छन् ।

मन्त्री मोदीले मिडियामा पारदर्शी सरुवा गरेको भ्रम छरेका छन् । तर सामान्य प्रशासन मन्त्रालयाट भित्रभित्रै आर्थिक चलखेलका आधारमा सयौं कर्मचारीको सरुवा गरिएको स्रोत बताउँछ । आर्थिक चलखेलका आधारमा गरिएको सरुवाको सूची नै सार्वजनिक गर्ने हिम्मत मन्त्री मोदीले गर्न सकेका छैनन् । त्यो सूची गोप्य राखिएको छ । उक्त सरुवा सूची सार्वजनिक गर्दा सरुवामा रकम असुली गरेको पर्दाफास हुने भएपछि गोप्य राखिको सामान्य प्रशासन मन्त्रालयका अधिकारी बताउँछन् ।

मन्त्री मोदीको सचिवालयका निजी सचिवदेखि स्वकीय सचिव र बिचौलियाले दररेट असुलेर सरुवा गरेकाले पोल खुल्ने भएपछि सरुवा सूची गोप्य राखिएको स्रोत बताउँछ । सामान्य प्रशासन मन्त्रालयले कतिपय आकर्षक कार्यालयका कर्मचारीको सरुवा गर्ने, मन्त्रीका सहयोगीसँग सेटिङ मिलेपछि भोलिपल्टै रद्द गर्ने पनि गरेको स्रोत बताउँछ ।