काठमाडौं महानगरले सामाखुशी खोलामाथिको प्रहरी बिट खाली गरायो

काठमाडौं। काठमाडौं महानगरले सामाखुशी खोलामाथि रहेको प्रहरी बिट खाली गराएको छ।

काठमाडौं महानगरपालिका-२६ स्थित खोलामाथि बनेको प्रहरी बिट शुक्रबार खाली गरिएको स्रोतले बतायो। प्रहरी बिट खाली गरिएपनि संरचना भने हटाइएको छैन।

काठमाडौं महानगरपालिकाले सामाखुशी खोलालाई पूर्ववत् अवस्थामा फर्काउन असारदेखि स्ल्याब हटाउन सुरू गरेको थियो।

वडा नम्बर ३ र २६ मा भने केही दिनअघि मात्रै स्ल्याब हटाइएको हो। स्ल्याबमाथि नै प्रहरी बिट रहेकाले त्यसलाई पनि हटाउन लागिएको हो।

खोलामाथिको स्ल्याब हटाइएपछि त्यस क्षेत्रलाई सुरक्षित बनाउन खोलाको दुई साइडमा वाल उठाउने र बार लगाउने काम चाँडै नै सुरू हुने छ।

स्ल्याब हटाइएपछि ह्वाङ्गै छोडिएका कारण त्यस क्षेत्रमा दुर्घटना र मानवीय क्षतिको जोखिम बढेको छ।

महानगरले खोलाकै छेउमा बनेका घरहरू पनि भत्काउने तयारी गरेको छ।