पेरिसडाँडामा बस्‍ने भनिएको नेकपा सचिवालय बैठक स्थगित, कारण यस्तो छ

काठमाडौं । नेपाल कम्युनिष्ट पार्टी (नेकपा) को सचिवालय बैठक स्थगित भएको छ। आज ११ बजेका लागि तय भएको बैठक स्थगित भएको पार्टी प्रवक्ता नारायणकाजी श्रेष्ठले जानकारी दिए । 

सो बैठक तत्कालीन माओवादी केन्द्रको केन्द्रीय कार्यालय रहेको पेरिसडाँडामा बस्‍ने तय भएको थियो । 

बैठक स्थगित गर्नुको कारण भने शनिबारको संविधान दिवस रहेको प्रवक्ता श्रेष्ठले बताए । भोलिको लागि आयोजना हुने कार्यक्रममा लागि सचिवालय सदस्य समेत रहेका उपप्रधान तथा रक्षामन्त्री ईश्वर पोखरेल र  गृहमन्त्री रामबहादुर थापा व्यस्त भएकाले बैठक सारिएको हो ।

स्थगित बैठक अब असोज ४ गते आइतबार आइतबार बिहान ११ बजे पेरिसडाँडामा नै बस्ने तय भएको प्रवक्ता श्रेष्ठको भनाई छ ।

यसअघिका प्राय: सबै सचिवालय बैठक प्रधानमन्त्रीको सरकारी निवास बालुवाटारमा बस्दै आएका थिए। पछिल्लो समय अध्यक्षद्वय केपी शर्मा ओली र पुष्पकमल दाहाल ‘प्रचण्ड’बीच ओलीले सरकार र प्रचण्डले पार्टी चलाउने सहमति भएपछि पार्टी बैठक पेरिसडाँडामा डाकिएको हो।

कार्यकारी हैसियतमा प्रचण्डले नै पेरिसडाँडामा बैठक राखेको बताइएको छ ।