अन्तत: वामदेव गाैतम बने सांसद, सपथ आजै हुने

सोमबारको मन्त्रिपरिषद्काे बैठकले गौतमलाई सांसदमा मनोनयनको लागि सिफारिस गर्ने निर्णय गरेको थियो । तर सो निर्णयअनुसार राष्ट्रपतिलाई प्रस्ताव पत्र भनेको पठाइएको थिएन।  बिहीबार प्रस्ताव पठाइसँगै राष्ट्रपति भण्डारीले गौतमलाई राष्ट्रिय सभा सदस्यमा मनोनित गरेका हुन् ।

राष्ट्रिय सभामा राष्ट्रपतिले नियुक्त गर्ने तीन जना सदस्यमध्ये पूर्व अर्थमन्त्री युवराज खतिवडाको कार्यकाल भदौ २० गते सकिएको थियो । रिक्त रहेको पदमा नेकपाले वामदेवलाई सिफारिस गर्ने निर्णय गरेको थियो । नेकपा सचिवालयले गरेको निर्णयअनुसार ०७४ सालको प्रतिनिधि सभाको चुनावमा बर्दियाबाट पराजित भएका वामदेव सांसद बन्न सफल भएका हुन् ।

वामदेवको सपथ आजै हुने भएको छ । वामदेवका प्रेस सहयोगी विश्वमणि सुवेदीका अनुसार राष्ट्रिय सभाबाट तयार रहनु भन्दै खबर आइसकेको छ । वामदेवलाई राष्ट्रिय सभाका अध्यक्ष गणेश तिमिल्सिनाले सपथ ग्रहण गराउनेछन् । आज ४ बजेका लागि सपथ कार्यक्रम तय भएको बताइएको छ ।