०८४ मा दुईतिहाइ दिनुस्, यो देश हामी बनाउँछौँ : रवि लामिछाने

काठमाडौं । राष्ट्रिय स्वतन्त्र पार्टीका सभापति रवि लामिछानेले नयाँ पार्टी आएपछि पनि प्रमुख दलहरुमा बदलाव नआएको र ०८४ सालमा दुईतिहाइ मत दिएर रास्वपालाई जिताउन आग्रह गरेका छन् । आज पार्टी कार्यक्रमका लागि डडेलधुरा पुगेका सभापति लामिछानेले यस्तो बताएका हुन्।

“हामीलाई लागेको थियो, नयाँ दलहरु आएपछि पुराना पार्टीहरुले चरित्र परिवर्तन गर्छन् होला भन्ने लागेका थियो । तर, आज सत्ता जोगाउने खेलमा पुराना राजनीतिक दलहरु लागेका छन् । उनीहरुलाई यो घण्टी खतराको घण्टी लागेकै छैन । यो घण्टी तोड्न लागिपरेका छन्, आफू सुध्रने लक्षण छैन,” लामिछानेले भने, “अहिले विभिन्न फाइल खोल्नेक्रम सुरु भएको छ । हामी खुसी छौँ । म डडेलधुराबाट भन्न चाहन्छु, फाइल बन्द गर्ने प्रयास नगर्नु होला, यसलाई जिस्क्याउने कुराझैँ नलिनुहोला । त्यसो गर्नुभयो भने यो खेल ०८४ सम्म त चल्ला, त्यसपछि चल्नेवाला छैन ।”

उनले देशको प्रमुख सत्रु नै भ्रष्टाचारी भएको भन्दै उनीहरुलाई जेल नहाली देश नबन्ने बताए । नक्कली भुटानी शरणार्थी प्रकरणमा केही नेता जेल गएको भन्दै आफूले यो प्रकरण जरैसम्म पुगेको हेर्न चाहेको बताए ।