ओली-प्रचण्ड छलफल, संवैधानिक नियुक्तिको लागि देउवासँग कुरा गर्ने

काठमाडौं । सत्तारुढ नेपाल कम्युनिष्ट पार्टी (नेकपा) का अध्यक्ष केपी ओली र कार्यकारी अध्यक्ष पुष्पकमल दाहाल ‘प्रचण्ड’बीच बुधबार छलफल भएको छ । दुईबीच संवैधानिक आयोगको रिक्त पदमा नियुक्तिलगायत विषयमा कुराकानी भएको थाहा भएको छ । 

दुई अध्यक्षले संवैधानिक निकायमा रिक्त रहेका पदपूर्ति गर्ने विषयमा बिहीबार प्रमुख प्रतिपक्षी दल नेपाली कांग्रेसका सभापति शेरबहादुर देउवासँग छलफल गर्ने भएका छन् ।

हाल अख्तियार दुरुपयोग अनुसन्धान आयोगको प्रमुख आयुक्त र आयुक्त, निर्वाचन आयोगका केही आयुक्तसहित विभिन्न संवैधानिक आयोग प्रमुखविहिन भएको छ।

यस्तै केही विश्वविद्यालयमा उपकुलपति र पदाधिकारीको पदसमेत रिक्त छ। सोही विषयमा सत्तापक्ष र प्रतिपक्षी बीच छलफल हुन लागेको हो ।