सर्लाहीमा गाडीको ठक्करबाट मोटरसाइकल चालकको मृत्यु

सर्लाही । सर्लाहीको ईश्वरपुरमा आज ऊ मंगलबार भारतीय नम्बर प्लेटको स्कारपियोको ठक्करबाट एक मोटरसाइकल चालकको मृत्यु भएको छ । भारतीय नम्बरको सो स्कारपियो चन्द्रनगर गाउँपालिकाका पूर्वअध्यक्ष चढ्ने रहेको प्रारम्भिक अनुसन्धानबाट खुलेको छ ।

चन्द्रनगरबाट ईश्वरपुरतर्फ जाँदै गरेको ज २ प ६४५२ नम्बरको मोटरसाइकललाई पछाडिबाट जाँदै गरेको बीआर ३० पी २४५९ नम्बरको स्कारपियोले ठक्कर दिँदा मोटरसाइकल चालक चन्द्रनगर गाउँपालिका २ का ४५ वर्षीय मनोज महतोको ज्यान गएको हो ।

उक्त दुर्घटनामा परी गम्भीर घाइते भएका महतोलाई स्थानीयले उपचारका लागि ईश्वरपुरस्थित अस्पतालमा लगिए पनि त्यहाँ उपचार सम्भव नभएपछि बर्दिबास लगिएकोमा उनको उपचारकै क्रममा मृत्यु भएको प्रहरीले जनाएको छ ।

दुर्घटनापछि भाग्न सफल भएको स्कारपियोलाई प्रहरीले नियन्त्रणमा लिए पनि चालक भने फरार भएका छन् । प्रत्यक्षदर्शीका अनुसार स्कारपियोमा चन्द्रनगरका पूर्वअध्यक्ष महेन्द्र महतो रहेको बताए ।

जिल्ला प्रहरी कार्यालयले भने प्रारम्भिक रुपमा पूर्वअध्यक्ष महतो चढेको जानकारी आए पनि यसबारे अनुसन्धान भइरहेको र चालकको खोजतलाससमेत भइरहेको जनाएको छ