संशोधन गरेर एमसीसी अनुमोदन गर्ने ओली–प्रचण्डको प्रस्ताव

काठमाडौं । नेपाल कम्युनिष्ट पार्टी (नेकपा) का अध्यक्षद्वय केपी शर्मा ओली र पुष्पकमल दाहाल प्रचण्डले तयार पारेका प्रस्तावमा मिलिनियम च्यालेञ्ज कर्पोरेसन (एमसीसी) ले पनि स्थान पाएको छ । 

दुई अध्यक्षले तयार पारेको प्रस्तावको १५औं बुँदामा यसबारे उल्लेख छ । प्रस्तावमा अमेरिकी सहयोग परियोजना एमसीसीलाई संसोधन गरेर संसदबाट अनुमोदन गर्नुपर्ने उल्लेख छ।

नेकपा स्थायी कमिटीको पाँचौ बैठकमा प्रस्तुत गर्न तयार पारिएको प्रस्तावमा भनिएको छ, ‘उक्त सम्झौतालाई राष्ट्रिय हितमा स्पष्ट पार्दै आवश्यकताअनुसार परिमार्जन र संशोधनसहित अनुमोदन गर्ने ।’

दलहरूबीच विवाद हुँदा तीन पटक संघीय संसद सचिवालयमा दर्ता भए पनि एमसीसी कम्प्याक्ट अनुमोदन भएको छैन । नेकपाका विभिन्न तहका नेताहरुले नै एमसीसीको कडा शब्दमा विरोध गर्दै आइरहेका छन् । एमसीसी कम्प्याक्ट र कम्प्याक्टसम्बन्धी कार्यदलको प्रतिवेदनमाथि स्थायी कमिटी र सचिवालयमा छलफल गरिने अध्यक्षद्वयको प्रस्तावमा जनाइएको छ ।

एमसीसीबारे अध्ययन गर्न नेकपाले गठन गरेको कार्यदलले यसअघि नै बुझाएको प्रतिवेदनमाथि पार्टी कमिटीमा छलफल गर्न लागिएको हो । कार्यदलले संशोधन र परिमार्जन गरेर मात्रै अनुमोदन गर्नुपर्ने सुझाव दिएको छ । 

नेपाल सरकार र अमेरिकी संस्था एमसीसीबीच २९ भदौ २०७४ मा एमसीसी कम्प्याक्टमा हस्ताक्षर भएको थियो । जसमा अमेरिकाले ५० करोड डलर अनुदान दिने र नेपालले १३ करोड डलर लगानी गर्नुपर्ने उल्लेख छ ।