भारत भ्रमण परिणाममुखी भएको प्रधानमन्त्रीको दाबी

काठमाडौं । प्रधानमन्त्री पुष्पकमल दाहाल प्रचण्डले आफ्नो भारत भ्रमण परिणाममुखी भएको दाबी गरेका छन् । चार दिने भारत भ्रमण सकेर आज साँझ स्वदेश फर्किएपछि त्रिभुवन विमानस्थलमा आयोजित पत्रकार सम्मेलनमा उनले भ्रमण विगतका भन्दा परिणाममुखी भएको बताएका हुन् ।

उनले सीमा समस्या समाधानका विषयमा भारतीय प्रधानमन्त्रीले दिएको अभिव्यक्तिबाट आफू उत्साहित भएको बताएका छन् । उनले दुई देशको राजनीतिक नेतृत्व तहमा विश्वासको वातावरण बनेको जिकिर गरे ।

ऊर्जा व्यापारमा लामो अवधिको सम्झौता हुनु, भारतीय प्रधानमन्त्री नरेन्द्र मोदीले नै १० वर्षमा १० हजार मेगावाट विजुली खरिद गर्ने कुरा गर्नु, पारवहन सम्झौता हुनु, रेलमार्ग, पुल निर्माण सुख्खा बन्दरगाह भारतले अनुदानमा बनाउन तयार हुनुजस्ता कुराले विश्वासको वातावरण बनेको उनको भनाइ छ ।