अर्थमन्त्रालयमा शितलनिवासकी बिमलाको चर्चा, ‘विसुवा’लाई धक्का

काठमाडौं । डा. युवराज खतिवडाले अर्थमन्त्रीबाट राजीनामा दिएपछि अर्थमन्त्रालयको जिम्मेवारी आफैंले राखेका प्रधानमन्त्री केपी शर्मा ओलीले मन्त्रिमण्डल विस्तारमा अर्थमन्त्रीको बागडोर कसलाई देलान् भन्ने कौतुहलको बिषय बनेको छ ।

अर्थमन्त्री हुने पात्रहरुको बारेमा मिडियाले विभिन्न अड्कलबाजी गरिरहेका छन् । तर प्रधानमन्त्री ओलीले भने अर्थ मन्त्रालयमा राज्यमन्त्रीको खोजी गरिरहेको बालुवाटार स्रोत बताउँछ । स्रोतका अनुसार अर्थमन्त्रालयमा राज्यमन्त्री बनाउने पात्रको बारेमा प्रधानमन्त्री ओलीको राष्ट्रपति विद्या भण्डारीसँग पनि अनौपचारिक छलफल भएको छ । त्यसका लागि उपयुक्त पात्रको रुपमा राष्ट्रियसभाकी सांसद डा.विमला पौडेल राईको नाम चर्चामा छ । उनले यसअघि राष्ट्रपतिको सल्लाहकार र योजना आयोगको सदस्यको रुपमा समेत काम गरिसकेकी हुन् ।  

थममाया थापा महिला, बालबालिका मन्त्री हुँदा राष्ट्रपतिको आडमा उक्त मन्त्रालयका कामकारबाहीमा उनको प्रत्यक्ष चासो रहने गरेको थियो । बिमला पौडेल हुँदा राष्ट्रियसभा, महिला र जनजाति तीनैतिरको प्रतिनिधित्व हुने भएकाले पनि उनलाई अर्थराज्यमन्त्री बनाउने चर्चा छ । राष्ट्रपतिको विश्वासपात्र भए पनि पौडेल राजनीतिक रुपमा उनी कमजोर नै मानिन्छिन् ।

अर्थमन्त्री प्रधानमन्त्री आफैं रहने र राज्यमन्त्री पौडेललाई राखी अर्थमन्त्रालय डा. खतिवडाले नै चलाउने तारतम्य अन्तर्गत यस्तो गृहकार्य बालुवाटारले गरिरहेको स्रोतको दाबी छ । विमला पौडेललाई अघि सारिएपछि अर्थमन्त्रीका लागि दाम्लो चुँडालेरै लागेकाहरु जिल्लाराम हुने भएका छन् । अर्थमन्त्रीको चर्चामा नेकपा उपाध्यक्ष वामदेव गौतम, महासचिव बिष्णु पौडेल, स्थायी समिति सदस्य सुरेन्द्र पाण्डे(बिसुवा)लाई धक्का पुगेको छ ।

यसअघि वामदेव गौतमका बिषयमा यसअघि नागरिक समाजका तर्फबाट वक्तब्य जारी गर्ने १० भाइ मध्येका एक टीका ढकाल राष्ट्रपतिको संचार तथा सूचना विज्ञ नियुक्त हुनु नै उनका लागि बाधक बन्न पुगेको एकथरीको टिप्पणी छ ।

कुनैबेला जर्मनी राजदूताबासका कर्मचारी ढकाल सुशील प्याकुरेल र कनकमणि दीक्षितहरुको डिजाइनमा शितलनिवास छिर्न सफल भएका हुन् । पाँचथर घर भएका र माओवादी पारिवारिक पृष्ठभूमिका ढकाल पश्चिमा देशका बफादार हुन् । गत बैशाखमा नागरिक समाजका अगुवाका तर्फबाट ओली सरकारलाई ढाडस दिने १० भाइमध्ये डा. अर्जुन कार्की, विपिन अधिकारी, कनकमणि दीक्षित, जयप्रकाशप्रसाद गुप्ता, रामेश्वर खनाल, रेणु अधिकारी, रेम विश्वकर्मा, सूर्यराज आचार्य, सुशील प्याकुरेलसँगै टीका ढकाल पनि थिए । त्यही बर्को ओढेर ढकाल राष्ट्रपतिको सल्लाकार भएपछि नेकपा निकट पत्रकारहरुबीच हलचल मच्चिएको छ ।

नेकपा बृत्तमा न नाम न काम गरेका ढकाल शितलनिवास दाहिना भएपछि वाम पत्रकारहरुले असन्तुष्टी जनाएका छन् । काम गर्ने कालु मकै खाने… भालु जस्तै भएको टिप्पणी नेकपा निकट पत्रकारहरु गर्न थालेका छन् । राष्ट्रपतिको यो कदमबाट निराश बनेका वामपन्थी पत्रकारहरु राष्ट्रपतिको पक्षमा कलम नै नचलाउने निष्कर्षमा पुगेका छन् ।