सिन्धुपाल्चोकमा मोटरसाइकल दुर्घटना हुँदा २ जनाको मृत्यु

सिन्धुपाल्चोक। सिन्धुपाल्चोकको चौतारा साँगाचोकगढी नगरपालिका वडा नम्बर-४ कुबिन्डे ढुंगेखोलास्थित शनिडाँडामा मंगलबार राति मोटरसाइकल दुर्घटना हुँदा दुई युवकको मृत्यु भएको छ ।

जिल्ला प्रहरी कार्यालय चौताराका अनुसार बा ४५ प ५५४१ नम्बरको मोटरसाइकल दुर्घटनामा बलेफी गाउँपालिका- २ नौबिसेका २२ वर्षीय प्रदीप माझी र चौतारा साँगाचोकगढी नगरपालिका-११ का १६ वर्षीय अनिल माझीको घटनास्थलमै मृत्यु भएको हो ।

मंगलबार राति अन्दाजी १२ बजेतिर मोटरसाइकल सडकबाट १५० मिटर तल झरेको प्रहरीले जनाएको छ । १२ बजे दुर्घटना भए पनि प्रत्यक्षदर्शीले बुधबार बिहान मात्रै मोटरसाइकल क्षतिग्रस्त देखेर प्रहरीलाई खबर गरेका थिए ।

बिहानै पुगेको सुरक्षाकर्मीले आवश्यक स‍ोधपुछ र अनुसन्धान थालेको सूचना अधिकारी डीएसपी रामकुमार यादवले जानकारी दिए ।