आकाशमा उडिरहेको जहाजको आपतकालीन ढोका खोलेपछि…

काठमाडौं । दक्षिण कोरियामा आकाशमा उडिरहेको जहाजमा एक यात्रुले आपतकालीन ढोका खोलेपछि विमानमा सवार १२ जना यात्रु घाइते भएका छन् ।

शुक्रबार उडिरहेको विमानमा यात्रुले आपतकालीन निकास (एक्जिट) ढोका खोलेका थिए, जसको कारण जहाजभित्र हावा पसेर यात्रीलाई सास फेर्न गाह्रो हुँदा १२ जना घाइते भएका थिए । यद्यपि जहाजका चालकदलले विमान सकुशल अवतरण गरेका थिए ।

एसियाना एयरलाइन्सको एयरबस ए३२१ विमानमा सवार एक व्यक्तिले उक्त आपतकालीन ढोका आंशिक रुपमा खाेलेका थिए । जहाजमा सवार अन्य यात्रुले रोक्दा ढोका पूर्ण रुपमा खुल्न पाएन । यसले गर्दा सम्भावित घटना टरेको थियो । ती व्यक्तिलाई हवाई सुरक्षा कानून उल्लंघन गरेको आराेपमा विमानस्थल प्रहरीले नियन्त्रणमा लिएको छ ।

उक्त व्यक्तिको पहिचान भने खुलाइएको छैन ।

१९४ जना यात्रु बोकेको उक्त विमान दक्षिणी टापु जेजुबाट दक्षिणपूर्वी सहर डेगुतर्फ गइरहेको थियो । उडान सामान्यत: करिब एक घण्टाको हुन्छ । विमान ७०० फिट को उचाइमा डेगु एयरपोर्ट पुग्नै लाग्दा यो घटना भएको थियो ।