गण्डकी प्रदेशमा कांग्रेसका पाण्डे मुख्यमन्त्री बन्दै

काठमाडौँ। गण्डकी प्रदेशमा आज(बिहीबार) नयाँ मुख्यमन्त्री नियुक्त हुँदैछन्। केन्द्रीय सत्ता समीकरण फेरिएपछि प्रदेशका सरकार पनि एकपछि अर्को फेरिन थालेका हुन् ।

गण्डकीमा यसअघि नेकपा एमालेका खगराज अधिकारीले विश्वासको मत प्राप्त गर्न नसकेपछि संविधानको धारा १६८(२) अनुसार नयाँ मुख्यमन्त्री नियुक्त हुन लागेको हो ।

प्रदेश प्रमुख पृथ्वीमान गुरुङले संविधानको धारा १६८(२) अनुसार सरकार गठनका लागि दलहरूलाई दिएको समय बिहीवार अपराह्न ४ बजे सकिँदैछ ।

यसअघि माओवादीले समर्थन फिर्ता लिएपछि एमालेका अधिकारी अल्पमतमा परेपछि अन्ततः विश्वासको मत पाउन असफल भएका थिए । फेरि गण्डकीमा माओवादी नै सरकार गठनका लागि निर्णायक बनेको छ ।

मुख्यमन्त्रीका लागि माओवादीले पनि दाबी गरेको छ तर केन्द्रले निर्णय गरेअनुसार कांग्रेसले पहिले मुख्यमन्त्री लिने समझदारी भएको कांग्रेस स्रोत बताउँछ । कांग्रेस संसदीय दलका नेता सुरेन्द्र पाण्डे नै मुख्यमन्त्री बन्नेछन् ।

गण्डकीमा काँग्रेस माओवादीबीच मुख्यमन्त्रीमा आलोपालो गर्ने सहमति भएको छ । तर, दुई दलबीच अवधि भने निर्धारण भएको छैन।