रवि लामिछानेले दिएको ७२ घन्टाको समयसीमा सकियो, २ करोड माग्ने सांसद ढाकामाथि कारबाही भएन

काठमाडौं । राष्ट्रिय स्वतन्त्र पार्टीका (रास्वपा) का सभापति रवि लामिछानेले मेडिकल व्यवसायी दुर्गा प्रसाईंसँग २ करोड रकम मागेको अडियो प्रकरणमा दोषी देखिए आफ्ना सांसद ढाकाकुमार श्रेष्ठलाई कारबाही गर्छु भनेर सार्वजनिक रुपमा बारामा प्रकट गरेको अभिब्यक्तिको समयसीमा सकिन लागेको छ ।

२०७९ चैत २६ गते आइतबार बिहान अडियो सार्वजनिक हुनासाथ लामिछानेले ७२ घन्टाभित्र ढाकाकुमार श्रेष्ठलाई कारबाही नगरेमा यही नजिकैको गढीमाईमा बलि दिनुहोला भनेर बारा २ को चुनावी सभामा सम्बोधन गरेका थिए । त्यो समयसीमा सकिन लाग्दा पनि रास्वपाले श्रेष्ठलाई कारबाही गरेको छैन । बरु मंगलबार सांसद ढाकाकुमार श्रेष्ठले पार्टीले आफूलाई मात्र कारबाही गरे ‘कोर टिम’को पोल खोलिदिने चेतावनी दिएका छन् । अडियो टेपको छानबिन गर्न गठित रास्वपाको अनुशासन तथा आचरण समितिलाई मंगलबार करिब एक घण्टा बयान दिने क्रममा उनले यस्तो चेतावनी दिएका हुन् । यो चेतावनीपछि रास्वपालाई ढाकाकुमारमाथि कारबाही गर्न सकस पर्ने भएको छ ।

मंगलबार बयान लिएपछि ढाकाकुमारमाथिको कारबाहीका बारेमा राष्ट्रिय स्वतन्त्र पार्टीले बुधबार (आज) बोलाएको केन्द्रीय समिति बैठक नै सारिएको छ । सांसद ढाकाकुमार श्रेष्ठसँग जोडिएको अडियोबारे निर्णय लिन ९ बजेका लागि बोलाइएको बैठक २ बजेका लागि सारिएको हो ।

पार्टीका नेताहरु चुनावी अभियानमा चारैतिर खटिएकाले बैठक सारिएको रास्वपा महामन्त्री मुकुल ढकालले जानकारी दिएका छन् । तर सभापति लामिछानेले ७२ घन्टाभित्र कारबाही गर्ने समयसीमा दिइसकेपछि चुनावी बहानामा बैठक सारिएको छ । कोर टीमको पोल खोल्ने श्रेष्ठको चेतावनीपछि रवि लामिछाने कारबाहीबाट पछि हटेको अर्थ पनि लगाउन थालिएको छ । ढाकाकुमारको अडियो सार्वजनिक गर्ने दुर्गा प्रसाईले लामिछानेको कोर टिममा स्वयं उनी, उनकी श्रीमती निकिता लामिछाने पौडेल र दीपक बोहरा रहेको खुलासा गरिरहेका छन् ।