सत्ता गठबन्धनप्रति ओलीको टिप्पणी – १० टाउके रावण महिलाको अधिकार खोस्न लागे

काठमाडौं । नेकपा एमालेका अध्यक्ष केपी शर्मा ओलीले १० दलिय गठबन्धनले महिलाको अधिकार खोस्न निर्वाचन आयोगलाई प्रयोग गरेको आरोप लगाएका छन् । उपराष्ट्रपति निर्वाचिनबारे देशभरका एमाले सांसदको अभिमुखीकरण कार्यक्रमलाई सम्बोधन गर्दै यस्तो बताएका हुन् ।

अध्यक्ष ओलीले उपराष्ट्रपतिमा अष्टलक्ष्मी शाक्यले जित्नैपर्ने बताएका छन् । यसका लागि हरेक सांसद र प्रदेशसभा सदस्यले अर्को एक/दुई जनालाई मिलाउनुपर्ने उनको भनाइ छ ।

उनले भने, ‘कमरेड अष्टलक्ष्मी शाक्यलाई पार्टीले उपराष्ट्रपतिको उम्मेदवारका रूपमा उठाएको छ । ३ गते मतदान हुँदैछ । उहाँले जित्नैपर्ने छ । यसका लागि सबै पार्टीसँग कुरा गरिरहेका छौं । तपाईंहरुले पनि एकदुई जना मिलाउनुस्, अरुलाई पनि मिलाउनुस् । यसमा ह्वीप उल्लंघनको प्रश्न छैन ।’

उनले १० दलीय गठबन्धनभित्र अनेक प्रकारका समस्याहरू रहेको पनि दाबी गरे । संविधानमा राष्ट्रपति उपराष्ट्रपतिबारे स्पष्ट फरक लिङ्ग हुनुपर्ने भने पनि सत्ता गठबन्धनले त्यसलाई अस्वीकार गरेको भन्दै अध्यक्ष ओलीले भने, ‘१० वटा टाउको एकै ठाउँमा रावणको हुन्छ । १० टाउके रावण । अहिलेको रावण पनि फेरि महिलाका हक अधिकार हरण गर्न लागेको देखेको छु ।’