एमाले अध्यक्ष ओली आज झापा जाँदै, बुधबारसम्म दमकमा रहने

काठमाडौं । आगामी फागुन २१ गते हुने निर्वाचनमा झापा–५ सबैभन्दा चर्चित क्षेत्र बनेको छ । नेकपा (एमाले)का अध्यक्ष केपी शर्मा ओली र रास्वपाका बालेन्द्र साहको उम्मेदवारीले झापा– ५ बहुचर्चित छ । उक्त क्षेत्रमा बालेन साहले ओलीबिरुद्ध उम्मेदवारीमात्र दिएका छन् ।

बालेन साह र ओलीबीच कडा प्रतिस्पर्धा हुने अनुमान गरिएको छ । उक्त क्षेत्रबाट साह उठेपछि एमाले अध्यक्ष ओलीले निकै मेहनत गर्दैआएका छन् । उनी झापा ५ का घरदैलो अभियानमा हिंडिरहेका मात्र छैनन्, मतदाताका गुनासा पनि सुनिरहेका छन् । यसैक्रममा ओली आज बिहान १० बजेर २० मिनेटमा काठमाडौंबाट भद्रपुर विमानस्थल अवतरण गरी निर्वाचन क्षेत्रमा प्रवेश गर्ने तालिका छ ।

आजको कार्यक्रमअनुसार ओली शिक्षक भेला, धिमाल जातिको भेला तथा मुस्लिम समुदायका नागरिकसँगको भेलामा सहभागी हुनेछन् ।

त्यसपछि दमक–२ स्थित अस्थायी निवासमा भौगोलिक क्षेत्रका कार्यकर्ता र आम नागरिकसँग प्रत्यक्ष भेटघाट गर्ने कार्यक्रम तय गरिएको नेकपा एमाले झापाका सचिव तुलसी कार्कीले जानकारी दिए ।

उनी फागुन ६ गतेसम्म झापामै बस्ने छन् । यो अवधिमा दमक क्षेत्रका विभिन्न गाउँ र टोलमा पुगेर घरदैलो कार्यक्रम गर्नेछन् ।

हरेक दिन कम्तीमा ६ देखि ७ स्थानमा कार्यक्रम पुग्ने गरी रुट मिलाइएको छ । ओली यसअघि माघ २३ गते झापा आएर ७ दिनमा करिब ८० वटा गाउँ घुमी काठमाडौँ फर्केका थिए ।