ओली-प्रचण्ड भेट सोमबारका लागि तय, कार्यदल प्रतिवेदनमा छलफल हुने

काठमाडौं । नेपाल कम्युनिष्ट पार्टी (नेकपा) को विवाद समाधानको प्रक्रिया तीव्र गतिमा अघि बढेको छ । शनिबार नेकपा कार्यदलले बुझाएको सुझावसहितको प्रतिवेदनमाथि छलफल गर्न प्रधानमन्त्री तथा नेकपा अध्यक्ष केपी शर्मा ओली र अर्का अध्यक्ष पुष्पकमल दाहाल प्रचण्डबीच भेट हुने भएको छ । 

दुई अध्यक्षबीच सोमबार बिहान भेट हुने तय भएको बालुवाटार स्रोतले जानकारी दियो । 

नेकपा कार्यदलले बुझाएको प्रतिवेदनमा सरकारको काम प्रधानमन्त्री ओलीको जिम्मेवारीमा र पार्टीको काम प्रचण्डको जिम्मेवारीमा हुने लगायतको सुझाव दिएको थियो । 

कार्यदलको सुझाव अनुसार प्रम ओलीले अहिले नै राजीनामा दिनु नपर्ने र स्थायी समिति बैठक अघि बढाउनुपर्ने सुझाव दिएको छ । यस्तै पार्टीको महाधिवेशन पनि चैतकै लागि उपयुक्त हुने सुझाव समेत दिएको छ ।

नेकपा विवाद जरो भनेकै प्रचण्डलाई नाममात्रको कार्यकारी अध्यक्ष बनाइनु थियो । प्रचण्डको माग पूरा हुनेगरी समेत कार्यदलले सुझाव दिएको छ । अबदेखि सरकार सञ्चालनको नेतृत्व ओलीको र पार्टी सञ्चालनको जिम्मेवारी प्रचण्डको हुने सुझाव दिइएको छ । 

यस्तैगरी यसअघि मन्त्री नियुक्ती तथा प्रदेशका मुख्यमन्त्री बनाउने क्रममा प्रम ओलीले एकलौटी गरेको निर्णयहरु समेत परिवर्तन गर्न सुझाव दिइएको छ । मन्त्रिमण्डलमा नेता माधव नेपाल र प्रचण्डलाई चार मन्त्री दिने तथा दुई मुख्यमन्त्री फेर्ने गरी सुझाव दिएको नेकपा निकट स्रोतले बताएको छ । 

यस्तैगरी कोरोना महामारीको अन्त्यपछि मात्रै केन्द्रीय समिति बोलाउन समेत सुझाव दिइएको छ ।

यसअघि दुई अध्यक्षबीच आजै छलफल हुने तयारी थियो तर प्रतिवेदन अध्ययन गर्नुपर्ने भएको भन्दै सोमबारका लागि भेट तय गरिएको हो ।