माधव नेपालसँग एमाले नेताले मागे सुवासको पक्षमा मत

काठमाडौँ। नेकपा एमालेका शीर्ष नेताहरूले एकीकृत समाजवादीका नेताहरूसँग भावी राष्ट्रपति निर्वाचनमा एमाले उम्मेदवार सुवासचन्द्र नेम्वाङको पक्षमा मत मागेका छन् । आज बिहीबार नेम्वाङलाई मत माग्न एमाले नेताहरू नेकपा एकीकृत समाजवादीको कार्यालय पुगेका थिए ।

त्यस क्रममा एमाले नेताहरुले अध्यक्ष माधवकुमार नेपालसहित सो पार्टीका पदाधिकारीहरूसँग लामो कुराकानी गरेका छन् । आलोकनगरस्थित एकीकृत समाजवादीको पार्टी कार्यालयमा भएको दुई पार्टीका नेताहरूको भेटमा एमाले नेताहरूले मत माग्नुका साथै पार्टी एकताको प्रस्ताव गरेका थिए ।

भेटवार्तापछि एमाले उपमहासचिव समेत रहेका पृथ्वी सुब्बा गुरुङले राष्ट्रपति निर्वाचनका सन्दर्भमा विभिन्न पार्टीहरूसँग छलफल चलाउने पार्टी निर्णय अनुसार एकीकृत समाजवादीका नेताहरूसँग पहिलो भेटवार्ता गरेको बताए । त्यस क्रममा नेकपा एकीकृत समाजवादीका अध्यक्ष माधव नेपालसहितका सबै पदाधिकारीसँग कुराकानी गर्दै सुवासचन्द्र नेम्वाङको पक्षमा मतदान गर्न अपिल गरेको बताए ।

एमाले नेताहरू राष्ट्रपति पदका उम्मेदवार उपाध्यक्ष सुवास नेम्वाङ,उपाध्यक्ष विष्णु पौडेल र उपमहासचिव पृथ्वीसुब्बा गुरुङ,रघुवीर महासेठ र विमला राई समाजवादीका अध्यक्ष नेपालसहितका नेतालाई भेट्न आलोकनगर पुगेका हुन् । एमाले नेताहरूले आजै बिहीबारै राप्रपा र रास्वपाका अध्यक्षलाई भेटेर मत माग्ने तयारी गरेका छन् ।