गुप्ता प्रवेश गराउन ओली कपिलवस्तुमा पुगेकै दिन पूर्वराज्यमन्त्री यादवले एमाले छाडे

कपिलवस्तु । । नेकपा एमालेका अध्यक्ष केपी शर्मा ओलीले तामझामका साथ बृजेशकुमार गुप्तासहितका हृदयेश त्रिपाठीका निकट नेता कार्यकर्ता पार्टीमा प्रवेश गराएका छन् । ओलीले गुप्तालाई एमालेमा प्रवेश गराइरहँदा कपिलवस्तुकै एमाले नेता तथा पूर्व कृषि राज्यमन्त्री ओमप्रकाश यादव जनता समाजवादी पार्टी नेपाल (जसपा) मा प्रवेश गरेका छन् ।  

जसपा जिल्ला समन्वय समिति, रुपन्देहीले आइतबार मायादेवी गाउँपालिका–४ स्थित सेमरीमा आयोजना गरेको जनसभा तथा पार्टी प्रवेश कार्यक्रममा एमाले परित्याग गर्दै उनी जसपामा प्रवेश गरेका हुन् । यादवले एमालेमा रहुन्जेल गरेका कामको समीक्षा पार्टीले नगरेको उनको गुनासो थियो । 

एमालेमा रहेका नेता कार्यकर्ता नै ओलीको ब्यक्तिवाद र चरम गुटबन्दीको पेलानमा परी कतिपय उकुसमुकुस अवस्थामा छन् भने कतिपयले बिद्रोह गरिरहेका छन् । भानुभक्त जैशी, सुवास कर्माचार्य, धर्म निरौला लगायतका नेता कार्यकर्ताहरु एमालेमा बस्नै नसक्ने भएपछि बिद्रोह गरी नेकपा समाजवादीमा क्रियाशील भइसकेका छन् ।

दस बुँदे सम्झौता गरी एमालेसँग मिसिएकाहरु पनि घरको न घाटको भएका छन् । उनीहरुलाई महत्वपूर्ण जिम्मेवारी नदिई सहायकमा मात्र सीमित गरिएको छ । एमालेमै रहेका र लामो योगदान भएकाहरुलाई जिम्मेवारी नदिई राखेका ओलीले पार्टीमा भित्र्याउने होड चलाएका छन् ।