निर्वाचनलाई लिएर विप्लवको पार्टीमा दुई धार, सचिवालय सदस्यहरू नै चुनावको विपक्षमा

काठमाडाैं । नेत्रबिक्रम चन्द विप्लव नेतृत्वको नेपाल कम्युनिष्ट पार्टी (नेकपा) मा निर्वाचनमा जाने\नजाने विषयमा दुई धार देखिएको छ ।

शुक्रबारदेखि कपिलवस्तुमा जारी केन्द्रीय कमिटि बैठकमा महासचिव विप्लवले शान्तिपूर्ण राजनीतिमा आउन आउँदो स्थानीय तहको निर्वाचनमा सहभागिता जनाउनुपर्ने बताएका छन् ।

विप्लवसहित खड्कबहादुर विश्वकर्मा, सन्तोष पुनलगायत नेताहरू चुनावको पक्षमा रहेपनि यता सचिवालय सदस्य धर्मेन्द्र बास्तोला र हेमन्तप्रकाश ओली भने चुनावको विपक्षमा उभिएका छन् ।

बास्तोलाले चुनावको विरोध गरे पनि राष्ट्रपतीय प्रणालीको एजेण्डा अगाडि बढाउनुपर्ने तर्क गरेका छन् भने ओलीले चुनाव बहिष्कारनै गर्नुपर्ने बताएका छन् ।

‘पार्टीमा दुई धार स्पष्ट देखिएको छ । सचिवालयकै नेताहरू चुनावको पक्ष र विपक्षमा छन्,’ एक केन्द्रीय सदस्यले भने, ‘हामीले शान्तिपूर्ण राजनीतिमा आउने भनेर सहमति गरिसकेपछि अब चुनावमा जानुपर्छ भन्ने मत बलियो छ। केही साथीले अहिले जस्तो निर्वाचनमा गएर अर्थ नहुने बताउनुभएको छ।’