काठमाडाैं । पूर्वराजा ज्ञानेन्द्र शाह र पूर्वरानी कोमल नयाँ वर्ष मनाउन झापा जाने भएका छन् ।
निर्मलनिवास स्रोतका अनुसार पूर्वराजा ज्ञानेन्द्र र पूर्वरानी कोमलकाे झापाको दमकस्थित आफ्नै स्वामित्वमा रहेको हिमालय टी हाउसमा बस्ने गरी कार्यक्रम तय भएको हो ।
११ गते शुक्रबार दिउँसो हवाईमार्गबाट झापा जाने तयारीमा रहेका शाह दम्पतीको सुरक्षा र कन्भेसहितको टोली भने भोलि (सोमबार) झापा जाने कार्यक्रम रहेको छ।
झापामा केही दिन आराम गरेपछि तराईका विभिन्न जिल्ला भ्रमण गर्नेसमेत कार्यक्रम रहेको स्रोतले जानकारी दिएकाे छ । यद्यपि, अहिलेसम्म भने कुनै कार्यक्रम भने तय भइसकेको छैन ।
कोरोना महामारीका कारण लामो समय निर्मल निवासमा बस्दै आएका पूर्वराजा ज्ञानेन्द्रको परिवार लामो बसाइका लागि झापा जान लागेका हुन् । ज्ञानेन्द्रसँग केही कर्मचारी र निजी सचिव सागर तिमल्सिना जाने कार्यक्रम रहेको छ ।
