बाढीपहिरोको कारण देखाउँदै नेकपा स्थायी समिति बैठक ७ दिन स्थगित

काठमाडौं । नेकपा स्थायी समिति बैठक पुनः ७ दिनपछि सारिएको छ । आज बोलाइएको बैठक ७ दिनसम्म स्थगित गरिएको छ । बाढीपहिरोको विपतको बेला पार्टी पंक्तिलाई राहत तथा उद्धारमा जुट्न निर्देशन दिँदै नेकपाले स्थायी कमिटी बैठक थप सात दिनसम्मका लागि स्थगित गरेको जनाएको छ । नेकपाका प्रवक्ता नारायणकाजी श्रेष्ठले सामाजिक संजाल ट्वीटरमार्फत् स्थायी कमिटीको बैठक स्थगित भएको जानकारी दिएका छन् । नेकपा स्थायी समितिको बैठक साउन २ गते ११ बजे बस्ने भएको छ ।

श्रेष्ठले लेखेका छन्–‘देशभर भैरहेको अतिवृष्टि र सिन्धुपलाञ्चोकलगायत केही जिल्लाहरुमा जनधनको ठूलो क्षतिसमेत भइसकेको स्थितिमा सम्पूर्ण पार्टीपंक्तिलाई उद्दार एवं राहातमा लाग्न र आसन्न सम्भावित क्षतिलाई सकेसम्म रोक्ने कार्यमा लाग्न पार्टीको तर्फबाट निर्देशन दिँदै स्थायी कमिटीको बैठक ७ दिन स्थगित ।’

बैठकमा अधिकांश स्थायी समिति सदस्यले प्रधानमन्त्री ओलीलाई दुवै पदबाट राजीनामा दिनुपर्ने धारणा राखेका थिए । तर प्रधानमन्त्री ओली एक पदबाट पनि नछाड्ने अडानमा टसमस भएका छैनन् । ओलीले दुवै पद नछाड्ने भएपछि पार्टी नै फुटको दिशामा जान लागेको भन्दै पार्टीका नेताहरुले स्थायी समिति बैठक पटक पटक स्थगित गर्दै छलफल गरिरहेका छन् । तर अहिलेसम्म निष्कर्ष निस्कन सकेको छैन ।