महाधिवेशन प्रतिनिधिलाई गगन थापाको अपिल: काङ्ग्रेसको रुपान्तरणका लागि शेखर कोइरालालाई मत दिनुस्

काठमाडाैं । नेपाली काँग्रेस महामन्त्री पदका उम्मेदवार गगनकुमार थापाले दोस्रो चरणमा हुन लागेको मतदानमा सभापतिका उम्मेदवार शेखर कोइरालालाई मतदान गर्न अपील गरेका छन् ।

उनले मंगलबार सामाजिक सञ्जाल फेसबुक मार्फत पार्टी रुपान्तरण र नेतृत्व परिवर्तनका पक्षमा रहेका महाधिवेशन प्रतिनिधिलाई दोस्रो चरणमा हुने मतदानमा कोइरालालाई भोट हाल्न आग्रह गरेका हुन् । 

महाधिवेशन प्रतिनिधिहरूलाई सम्बोधन गर्दै थापाले जारी गरेको अपिलमा इतिहासले असाधारण निर्णय लिन आह्वान गरिरहेको उल्लेख गरिएको छ।

उनले भनेका छन्- सभापति चयनका लागि दोस्रो चरणमा पुग्नु भनेको विद्यमान नेतृत्वको निरन्तरताका विपक्षमा तपाईंको चाहना हो भन्ने म ठान्दछु । अब त्यो चाहनालाई मतपत्र मार्फत प्रकट गर्ने क्षण आएको छ । नेपाली कांग्रेसको राजनीतिक जीवनमा यो अत्यन्त दुरगामी महत्वको निर्णय गर्ने क्षण हो। यस घडीमा इतिहासले हामीसँग त्यही असाधारण निर्णय लिन आह्वान गरिरहेको छ ।

उनले अहिले महाधिवेशन प्रतिनिधिले लिने निर्णयले दुरगामी प्रभाव पार्ने र गल्ती गरे इतिहासले माफी नदिने बताएका छ न्।

‘समुन्नत नेपाल सम्मानित नेपाली’ को सपना गर्न चाहिने वैचारिक स्पष्टता, सांगठनिक आधार र जुझारु नेतृत्व कोइरालासँग भएकाे भन्दै उनले यसपटक समयले सुम्पेको कार्यभारलाई आफ्नो कार्मद्वारा प्रमाणित गर्न अपील गरेका हुन् ।