देउवाको टीममा गुण्डानाइके गणेश लामा पनि केन्द्रीय सदस्यका उम्मेदवार

काठमाडौं । नेपाली कांग्रेसको १४ औं महाधिवेशनमा नयाँ कार्यसमितिका लागि आज मतदान भइरहेको छ । १३४ मध्ये २ पदमा निर्विरोध निर्वाचित भएपछि १३२ पदका लागि निर्वाचन हुँदैछ । सभापतिका उम्मेदवार प्रधानमन्त्री शेरबहादुर देउवा नै छन् ।

पत्रकार महासंघका पूर्वसभापति तारानाथ दाहालले नेपाली कांग्रेस ठेकेदार, गुण्डानाइके र अरबपतिहरुको कब्जामा गइसकेको पीडा सामाजिक संजालमा प्रकट गरेका छन् । 

नेपाली कांग्रेस अरबपति, ठेकेदार र गुण्डाहरुको कब्जामा गएको चर्चा भइरहेको बेला देउवाले आफ्नो टीमबाट गुण्डानाइके गणेश लामा नै केन्द्रीय सदस्यको उम्मेदवार बनाएका छन् । देउवा समूहले महाधिवेशनस्थल राष्ट्रियसभागृहमा बितरण गरेको आधिकारिक प्यानलको सूचीमा लामाको नाम छ ।

२०७४ फागुन ३० गते काठमाडौंको गौशालास्थित होटल पशुपति भिजनमा गोली चलेपछि पुगेको प्रहरी टोलीले गणेश लामालाई पेस्तोलसहित पक्राउ गरेको थियो । उनको साथबाट पेस्तोल र ६ राउण्ड गोली बरामद भएको थियो ।  

खुल्ला केन्द्रीय सदस्य ३५ जनामा लामा देउवाको प्यानलका केन्द्रीय सदस्यका उम्मेदवार हुन् । क्रमसंख्या १७ मा लामाको नाम छ । यसअघि अर्का गुण्डानाइके राजु गोर्खालीले पनि केन्द्रीय सदस्यमा उम्मेदवारी दिएका थिए । तर उनले उम्मेदवारी फिर्ता लिएका छन् ।